Aizawl: Health Minister Dr R Lalthangliana chuan MNF sorkar tirh atanga thla riat lekah district thar pathum an tihpuitlin thu sawiin, district thar pathumte hi khaichhuah zel an tum tih a sawi.
Nimin khan Hnahthial Lungleng venga Zofa Run-a ‘State Day 2023 Hnahthial District lawmna’ puala inkhawmah thu sawiin Dr R Lalthangliana chuan MNF sorkar tirh atanga thla riat lekah district thar pathum – Hnahthial, Khawzawl leh Saitual district tihpuitlin niin, hri leng karah pawh district thar tihpuitlinna tur hmasawnna ruhrel lian din turin hma an lak mek zel thu a sawi.
Bialtu MLA ni bawk Dr R Lalthangliana hian district pathum zingah Hnahthial chu a zim ber tih sawiin, heti chung hian district dangten an dawn hamthatna an dawng ve zel a, tun hnaiah hian district hospital building thar sakna tur, district thar pathum tana Rs. vbc 17 theuh pawh an dawng ve leh dawn nia sawiin, “Hun rei tak district bial hnufum lo ni tawh, district thar pathumte hi khaichhuah zel kan tum a ni,” a ti.
State Day lo pian chhan hi MNF movement kal zel a nih thu sawiin Dr R Lalthangliana hian, “Remna leh muanna kan neih atanga nei thei chauh kan ni a, kan sorkar tan leh MNF tan chuan ni chhinchhiah tlak, ni ropui leh danglam tak a ni a, sorkar pisa chawlh satliah ringawt ni lo, district tinah bawrhsap ho a hman ni se tih kan rel a, Mizoram tan hian a hlu bik riau a ni,” a ti bawk.
Hnahthiala Market Building Conference Hall-a ‘MUP Sub-Headquarters Hnahthial General Conference vawi 2-na’ chu nimin vek kha bialtu MLA Dr. R.Lalthangliana hian khuallian niin a hmanpui bawk.