Khawvelin a hriatpui miah lova US president a zin chhuah hi thil thleng khât tak a ni.
White House thuneitute pawhin Thawhtannia Joe Biden-a’n Russia-in a kah mawlh mawlh laia Ukraine khawpui, Kyiv a tlawh thut chu ‘tun lai huna beisei lawk loh thil thleng lian tak’ a nih thu a sawi hial.
Tun hma lama indo hun laia president-in Iraq leh Afghanistan a tlawhte kha chuan US sipai tam tak an awm lai a nih hlawm thu an sawi.
Biden-a hi Poland tlawh tum sa a ni a, hemi pah hian Ukraine pawh a tlawh dawn anga sawina chu chanchinbu thenkhatah chuan a chhuak ngei a; mahse, heti teh thut a ni erawh mi tin a barakhaih a ni ber mai.
Kyiv khawpui lailiah, air raid siren a rik vu vu reng laiin President Volodymyr Zelensky nen khawlaiah an inhmu a, he thil hian Poland-ah eng thil pawh sawiin ti se, a aiin thawm a nei lian zawk tawh tho tho dawn.
“Risk sang tak a ni a, mi tin thinlungah Joe Biden-a hi hruaitu, a inpeknaah chuan ti mai mai lo a ni tih a lantir a ni,” tiin White House communications director Kate Bedingfield chuan a sawi.
Phone tel lovin
Biden-a hi ni hnih cham turin Thawhtanni tlaia US chhuahsana Warsaw pan tur a ni.
A hun hmaa a chhuah avangin rinhlelhna chu a awm nghal a, Ukraine a tlawh mai thei tih sawi a awm.
Ni tina White House-a thuthar lakhawmtute kawmnaah Kyiv a tlawh dawn em tih hi zawh thin a ni a. “Zelensky-a nena inkawm hi ruahmannaah a awm lo va, Warsaw pawh lam thlen tumna a awm lo,” tia chhan a ni.
Kyiv a tlawh tur hi Zirtawpnia tihfel chauh kha a ni ta reng a; mahse, hemi tum hian president thawhpui hnai zual chuan thla eng emaw zat kal ta atang khan ruahmanna erawh an lo nei ru tawh.
Pathianni khan White House thuneitu sang chuan president hi Warsaw panin Thawhtanni zan dar 7:00 EST (India-a Thawhlehni zing dar 5:30)-ah a chhuak ang tih a sawi a. Hetih lai hian Air Force One chu Pathianni zing dar 4:15 EST-ah a thlawk chhuak daih thung a ni.
Thlawhnaa chuang hi an tlem hle a, a thawhpui hnai tak tak bakah medical team leh security officer te chauh an chuang.
President rual hian chanchinbumi pawh pahnih chauh kal phalsak an ni a. Engkim thup tur leh an kalkawngah pawh mobile phone khawih lo tura tih an ni a. Biden-a’n Kyiv a thlen hma loh chuan eng chanchinthar mah thehdarh lo tura tih an ni bawk.
US national security adviser Jake Sullivan chuan Biden-a a chhuah hma lawk hian Russia chuan a lo hre hman tih erawh a sawi.
Moscow hriattirna
President Biden-a hian thlawhna bakah relin Kyiv panin darkar 10 zet a chuang leh a. Hei hi Ukraine-a hmun dang tlawh a remchan zawk bakah Kyiv a tlawh hi danglam taka tih a duh vang a ni pakhat.
President-in a tlawh hi Moscow hnena Biden-a sorkarin Ukraine puihna lama a inpekzia hriattirna a nih rualin US-a voter-te hnuh hnaihna atana remchang a ni bawk.
A press secretary, Karine Jean-Pierre hnena kar hmasaa inthlan chungchang an zawhnaah American-ten Ukraine an thlawp nep deuh em ni tih an zawt.
A chhannaah chuan president-in thu a sawi apiang hian American mipuite hnen bakah khawvela mite hnena sawi a nih thu a sawi a. Thawhtannia thuchah a sawi pawh a tlem zawk, Republican-ten engtia rei nge US-in Ukraine a thlawp theih dawn tih a sawina a nih thu a sawi.
Biden-a’n Kyiv a tlawh thut avang hian Poland a tlawh tura a ruala a thlawhna, Air Force One-a chuang ve tura inngai tam tak pawh an chuang dawn ta lo va, a hranpain, thlawhna ngai tho; mahse, Air Force One ni ta si lovah an chuan a ngai dawn ta a ni.
Air Force One hi US president chuanna thlawhna sawina a ni a, a thlawhna ngai chiahah hian amah a chuan loh erawh chuan thlawhna pangngai ang bawka sawi mai thin a ni thung.