Nimin Assembly session-a Sport Minister Robert Romawi Royte leh ZPM Legislature Party Leader Lalduhoma ten house chhunga footballer Miriam-i chungchang sawia an inpuhna chu en let a ni dawn a, assembly speaker-in house-ah an puan mai theih thu a sawi.
Mamit bialtu MLA Er Lalzirliana’n sorkarin Miriam Lalnunsiami tanpuina a pek leh pek loh a zawhna chu chhangin sports minister chuan Mizoram Football Association (MFA)-te dilpuinain Mizoram State Sports Council-in December 15, 2022 khan tanpuina Rs. 25,000 pek a ni a, sorkar funded association tho, Mizoram Oympics Association pawhin Rs. 10,000 a pe tawh tih a sawi a, hemi chungchanga house member-ten sorkarin tanpuina pe lo ang deuha sawi awm chu hriat sual palh a nih thu a sawi.
ZLP Leader Lalduhoma chuan sports minister thu sawi lai chu lo hnialin Miriam-i tanpuina pek a nih dan a sawi a, “MFA-in Rs 25,000 an khawn khawmsak a, MSSC atangin bill leh an tum,” a ti a. Miriam-i inzaina senso chu Rs 60,000 a nih thu leh Rs. 40,000 chu an thianten an khawn khawm a, footballer Jeje-a phone atangin Gpay-in Miriam-i account-ah an pe tih a sawi a, sports minister-in sorkarin an senso zawng zawng chu an peksak nia house-ah a sawi chhuah thu sawiin, sorkarin a tumsak ang veka an sawi chu tha lo a tih thu a sawi ve thung.
Sports Minister Robert Romawia chuan chhang let lehin, sports infrastructure chungchang sawiho niah Serchhip bialtu MLA-in Miriam-i tanpuina pe lo angin sawi mah se, thil sensitive a nih avangin a chhang duh lo niin a sawi a. Kam khat mahin Miriam-i chungchang chu house-ah a sawi loh thu leh house chu inchachhuahna hmun tur a nih loh thu te, khami tuma sorkarin a inzaina pe lo anga sawi awm khan Miriam-i rilru pawh a tihnat thu te a sawi.
Sports minister leh ZLP leader hi House chhunga thu an sawi leh sawi lohah an inhnial lawk hman viau a, Speaker Lalrinliana Sailo chuan an thu sawi chu en let a nih tur thu sawiin, “He house hi a zahawm a, mipui pawh an zahawm a, thu dik lo sawi kan en ang,” a ti a; assembly secretariat officer-te chu en fel turin a ti.
Hemi chungchanga The Zozam Times zawhna chhangin assembly speaker chuan member pahnihte thu sawi chu officer-ten an en let a, vawiin session-ah chuan a hriat theih tawh a rin thu a sawi a, “Session-ah kan puang mai thei,” a ti bawk.