Power & Electricity Department Minister R Lalzirliana’n Mizorama electric pawh luh lohna khua panga a awm thu house a hrilh.
Nimina Assembly session-a MNF member Dr ZR Thiamsanga zawhna leh member dangte zawh belhna chhangin power minister chuan khaw ngain electric an neih loh chhan chu heng khuate hi census village an nih loh avangin DPR siamnaah telh an ni lo tih a sawi.
Heng bakah khaw thenkhat, electric pawh luh tawhna, tuna êng nei leh ta lo khuate pawh eng emaw zat an awm thu sawiin, khuarel chhiatnain electric pawh luhna a tihchhiat tak, chhunzawm leh hleihtheih taklohte pawh a awm tih a sawi a. Chungte chu department-in an en zui zel tih a sawi.
Power minister chuan electric-a harsatna phuhrukna turin solar energy lamah hmalakna a awm thu Dr ZR Thiamsanga zawhna chhangin a sawi a. Nimina a chhan hman tak loh, zawhna a chhannaa a tar lan danin Tlungvel Solar Plant atangin power MW 1.4 atanga 1.7 siam chhuah thin a ni a, Mizoramah solar power station paruk, MV 4.65 pe chhuak a awm bawk a ni.
Power minister hian Aizawl North I MLA Vanlalhlana zawhna chhangin Mizoramin hydel power station 15 a nei mek a, chung atanga power siam chhuah theih zat chu mai theih a ni lo a, fur leh thal tui awm dan danglam dante, a kawl azirte-in power a siam chhuah zat chu a danglam reng thin tih a sawi a ni.