Aizawl: N. Vanlaiphai khaw mipuiten nimin khan an khua atanga Block Agriculture Office (BAO) sawn chhuah a nih duh loh lantirin kawng an zawh.
N Vanlaiphai Joint Action Committee huaihawta kawngzawh huaihawt an thlawpzia lantirin an khaw chhunga sorkar pisa leh zirna sikul an khar bakah dawrkaiten dawr an khar a ni.
Kawngzawhnaah hian a remchang laiah dingin thusawi hrang hrang ngaihthlak a ni. Vaiveng kawnah N. Vanlaiphai Finance Secretary H Lalruatthanga’n thu a sawi a. Bangla Veng kawnah JAC Vice Chairman K. Vanlalpeka, Gate kawna VC Vice President F Lalremruata, Venglai kawnah VC Tresurer R Lalhminghluia leh kawngzawh hmawr bawkna Sanpoh kawna JAC Chairman Laltlanmawia leh N.Vanlaiphai VCP Laltanpuia ten thu an sawi.
Kawng zawhnaa thusawitute hian Hrangturzo bial chhunga khaw lian ber, N. Vanglaiphai-ah hmasawnna hnathawk tur tam tak a awm laiin, BAO sawn chhuah a ni chu thil tih awm lo tak a nih thu an sawi a. Sorkar chu BAO sawnna order sut tura an phut thu leh an phut anga hmalak a nih loh chuan N Vanlaiphaia rorel lai, MNF VC hruaitute chuan an nihna atanga an bân tur thute an sawi a ni.
BAO sawnna order lehkha chu hal a nih bakah hun eng emaw chen N. Vanlaiphaia BAO office awm chu khaw danga sawn a ni hian khawtlang mipui zah lohnaah an ngaih thu te, rorel lai VC-ten an nihna bânsan huama sorkar an kar chu an thlawp thute leh a rang lama BAO sawnna order sut tura sorkar an phut thute resolution an siam a ni.