Aizawl: Finance changtu, Chief Minister Zoramthanga chuan kum 2023-2024 budget tur a pharhin duhthusam ni lo mah se mi state dangte dinhmun thlir pawhin ziaawm pawl tak a nih thu a sawi.
Finance changtu hian, February 13, 2023 khan kum 2023-2024 chhunga Mizoram budget tur chu Assembly House-ah a pharh a, a tlangpuia budget chungchang sawihona (general discussion) member-ten an neih hnuah Thawhlehni khan a hmawrbawk niin khaikhawm a ni.
A hmawrbawktu, Finance Minister Zoramthanga chuan, “Ka budget rawn present tak hi duhthusam tih rual a ni lo, kan kal tawk tawk a. Mi state-te pawh an kal tawk tawk a ni,” a ti.
Budget present tur hian harsatna an tawk nasa a, eptu member-ten Covid-19 hi chhuanlam tling lo anga an sawi thin chu an hriat chian tawk loh vang nia sawiin, “Mi central minister-ten mahni nunna lakna khawp atana an manganpui, khawvela mi maktaduaiin kan thihpui kha engmah a ni lo tih theih kha a ni lo,” a ti.
Zoramthanga hian Covid-19 avanga sorkar laipui atangin a lo berah Rs vbc 3,000 chuang budget-in a hmuh tur ang a hmu lo chu, state harsa leh rethei tan chuan retheihpui tham a nih thu a sawi a. Hri leng bakah ramri buai avanga economy hloh ringawt pawh tam tak a ni a, vawk hri leng leh lirnghing pawhin nasa takin a ngawng laia tun dinhmun an thleng thei chu thil lawmawm tak a nih thu a sawi.
Covid-19 leng ziaawm hnuah sorkar laipui atangin pawisa tam tak lo kal leh theite chu a hmanna awm sa a nih thu a sawi a. Sorkar hnathawk hlawh pawh duhthusamin a ni khatnaahte sem chhuah duh viau mah se pawisa hmuhna pui ber, Delhi lamin thla thar niah an pek theih loh avangin thla tirah hlawh an pek chhuah theih loh thu a sawi.
Finance minister hian budget-te hi pawng dah pun thur thur an ngam lo tih a sawi a. Sum puk chungchangah pawh tuna an sum puk dante hi Mizoram state a nih tirh atanga a kal dan reng a ni tih sawiin, “Thil thar a ni lo. India ram state dangte pawhin an lo puk ang khan Congress sorkar hun lai zawng zawngah pawh puk a ni a, tuna sorkar pawhin an puk thin leh puk dan tur a ruat angin puk chhunzawm zel a ni,” tia sawiin, sum pukte chu rulh zel niin, puk zo chauha rulh nghal hi state kalphung a nih thu a sawi bawk.
Lengpui Airport chungchang sawiin chief minister hian, kumin kum tawp lamah chuan a hmelhmang a lo lan chuan mipuite rin ai daiha tha a ni dawn niin a sawi a. “A building sak zawh meuh chuan, tun dinhmunah hmarchhaka airport-ah a aia tha a awm ka ring lo. Guwahati ai pawhin a that ka ring. Chuvangin, tihchangtlung kan tum a, Rs vbc 100 telin project kan siam a, reilo teah kan hlawhtlinpui theih kan beisei,” a ti.
Chief minister hian Lengpui Airport-a trolley chungchang sawi bawkin, hnathawh nana hman avanga chhiate chu a thar za dang an inchawitir thu leh, tunah hian hman khawp 70 chuang a awm mek niin a sawi.