Excise & Narcotics department, Lunglei district-in Lunglei khawpuia grape wine zuar tura sorkarin phalna a pekte chu nimin khan ko khawmin an zawrh tur chungchanga hriat tur pawimawhte hrilhhriatna hun an hmang.
Excise Department, Lungleia Asst. Commisssioner P.C. Lalchhanhima chuan Lunglei khawpuia grape wine zawrh phalna sorkara diltu mi 50 chuang atangin mi pakua hnenah permit pek an ni tih sawiin, hetihlai hian permit an pek zinga pakhat chu sorkar hnathawk a lo nih vangin a permit cancel-sak leh a ni a, dawr pariat a awm dawn ta tih a sawi.
P.C. Lalchhanhima chuan wine chu zu ang ni lo mah se a tha lo zawnga hman chuan hman sual theih tak a ni tih sawiin, a zuartute khawtlang mipui leh YMA zai ngaia kal turin a ngen a. Kohkhawmnaah hian wine shop awmna tur venga VC leh YMA aiawhte bakah Sub Hqrs YMA hruaitute pawh an tel.
Khawtlang hruaitute chuan a zuar turte chu sorkarin permit a pek chhan anga khawtlang leh sorkar duh anga felfai tak leh a lei thei tur chin dik takte hnena hralh turin an ngen.