Aizawl: Nimin khan Pachhunga University College chuan an Lecture Hall-ah Pianpui Tawng Ni (International Mother Language Day) an hmang.
He hun hi Dr. Lalnunpuia Renthlei, Asst. Professor chuan a kaihruai a. Remlalthlamuanpuia, Asst. Professor chuan Pianpui Tawng Ni thupui a sawi a. Tawng chu hnam nihna (identity) kengtu a ni a, hnam nunphung (culture) nen a inzawm thu sawiin, “Mizo tawng chu Mizo hnam nihna pawimawh tak a ni,” a ti.
Kumina Pianpui Tawng Ni thupui, ‘Multilingual Education – A nescessity to transform education’ tih chu sawifiahin khawvel hnam tin, tawng hrang neite hian anmahni tawnga zirna dawn chu an dikna chanvo a nih thu a sawi tel bawk.
Thusawitu dang, Dr. H. Laldinmawia, Head, Department of Mizo chuan, Mizo tawng chu Mizote ta a ni a; mahse, mi zawng zawng tan a ni tih sawiin, “Mizo tawng hi a neituten kan humhalh a, a hman dik pawh kan zir zel a tul a, chutih rualin mi tam zawkin an hman zel theihnan kan tanrual zel a tul a ni,” a ti.
Pianpui Tawng Ni hmanaah hian BA leh MA Mizo zirlaite leh zirtirtute an tel a ni.