Aizawl: Kum 2019 atanga 2023 chhungin Mizoramah health sub-centre quarters 25 sak thar a ni a, hemi chhung vek hian health clinic centre 235 hawn thar a nih thu house-ah sawi a ni.
Nimina Assembly session-ah MNF member Zothantluanga, Dr F Lalnunmawia leh Dr L Thangmawia ten Health department kaihhnawih chhan tur zawhna hrang hrang an zawt a, health minister hi chhiat tawhna avanga session-ah a kal loh avangin Home Minister Lalchamliana’n zawhna te chu a chhansak.
Lalchamliana’n a tar lan danin kum 2019 atanga 2023 chhungin health sub-centre 305-te chu health & wellness centre-ah hlan kai an ni a, a bak sub-centre pariatte pawh kum 2023 March ral hma ngeiin hlan kai tum a ni a. Health & wellness centre 368-a thawk turin health & wellness officer 310 lak an ni tawh a ni.
MNF member C Lalmuanpuia zawhna ziaka Health Minister Dr R Lalthangliana’n a chhan danin Mizoramah primary health centre 61 a awm a, kum 2019 atanga 2023 chhung khan PHC chhe tawh 20 sak that a ni.