Aizawl :Thawhtanni zan khan Aizawl Vanapa Hall-ah Chin National Day vawi 75-na puala inkhawm buatsaih niin, chief minister Zoramthanga’n khuallian niin a hman pui.
Thusawiin chief minister Zoramthanga hian, Chin National Day kum 75-na a thleng chu lawmawm a tih thu a sawi a. Ramchhung buai avanga Myanmar rama Chin unau chengte’n mahni sahimna zawnga an ram an tlansan a ngai chu pawi a tih pui thu sawiin, an lo luh tirh kha Covid-19 hripui len nasat zual lai nen a in nang chu vanduaithlak a tih chu a sawi a. An tan Mizoram chhunga chengte chuan theihtawp an chhuah thu leh, Myanmar rama remna leh muanna a awm leh ngei an beisei pui thu a sawi.
Zoramthanga chuan, “Harsatna te hi Pathian remruat vek a nih avangin tunah chuan hrethiam rihlo mah ila, beiseina nen hmalam hun thlir phawt a tul chang a awm a. Zohnahthlak te kan inpumkhatna leh inunauna chu chhawm nun zel pawimawh a ni,” a ti.
He hunah hian Chin State Chief Minister hlui Salai Lian Luai leh Chin State MP hlui Dr. Naih Tam Maung te’n thu sawi bawkin, Mizoram sorkar leh mipuiin raltlante an lo tuamhlawm a an lo puihna zawng zawng chungah lawmthu an sawi.
CYMA, MZP, MSU, ZORO leh Manipur Kuki Inpui aiawhin thusawi ngaihthlak a ni bawk.