Manchester United rawlthar beiseiawm Alejandro Garnacho chuan kum nga daih contract thar ziak turin club nen inbiakremna an nei tawh niin British chanchinbu thenkhatin an tarlang.
Kum 18 mi Garnacho contract neihlai hi nakkum nipui a zo tur a ni a, United hian contract lian zawk ziahpui tur hi an zawrh a, kum 2028 thleng an hnena a cham theihna turin a hlawh nasa takin an tipung dawn.
An contract thar ziak tur hian sumdawnna lama an inrem dan tur tihfel chiah a ngai tawh niin an sawi a. Erik ten Hag-a squad-ah hma a sawn hle avangin tunah hian player tangkai zingah naupang tak chungin a tel a, hei vang hian squad player-te hlawh ang zat an hlawh phak tir ve dawn.
Garnacho season hmasa tawp lam khan first team tan inkhel tanin tun season-ah inelna hrang hrangah vawi 25 a inkhel tawh a. Goal thum khungin midang khung tur vawi nga a siamsak tawh.
Thla engemaw zat kalta atang khan contract thar ziak tur hian inbiakna an nei tan a. Team-ah a pawimawhna a len belh zel dan angin a hlawh pawh a pung ang.
Kum 2020 a Atletico Madrid atanga United pantu Garnacho hi a pa Spanish mi a ni a, a nu hi Argentine ni thungin ram pahnih tan youth football khel mahse senior team tan a la khel thei ve ve a ni.