Australia opener David Warner chuan India nena an khelh mek Border-Gavaskar Trophy Test Series a Test match hnuhnung pahnih chu hliam a neih avangin a khel dawn lo.
Kum 36 mi left-handed batsman rintlak hi Delhi a 2nd Test an khelh tumin Matt Renshaw chuan a thlak a. 2nd Test-ah hian a ni hnihnaah Warner hi a helmet-ah ball in a fuh a. Hei vang hian a lu lamah fimkhur thuhlaah hliam a nei ngaihchan nghal a ni a, concussion a nei tih hmuhchhuah a ni a. Hei bakah hian a kiu ah hliam a lo neih tawh avangin Australia-ah inentir turin a kir.
India in match li khelh tur Test Series kal mekah 2-0 a hma hruaiin Trophy an kawl chhunzawm dawn tih a chiang tawh.
Cricket Australia chuan Warner hian inenkawlna hun a neih hnuah March 17 atanga khelh tan tur One Day International match vawi thum India nen an inkhelh turah a tel theih an beisei thu an sawi.
Tun tum Australia in India an lo tlawh tum hian khel thei lo player an nei nual a. Josh Hazlewood chuan Test series pum khel lovin pace bowler Pat Cummins chu chhungkaw dam lohna avangin a inkhel lo leh bawk.