Mipa tennis a world number one ni mek Novak Djokovic chuan tunkarah mipa tennis rankings a hmun sang ber a luah kar 377-na a hmang a. Hmeichhe tennis player ropui Steffi Graf record chu a tluk.
Kum 35 mi Serbian star hian kum 2021 March thla atang khan mipa inelna a world number one nihna hauhtu rei ber record a lo siam tawh a. Thawhtanni khan German legend Graf-i record hi a tluk ta chiah a ni.
Djokovic ang bawk a Grand Slam title vawi 22 la tawh Graf hi kum 1987 khan a vawikhatna atan hmeichhe rankings-ah number one a ni a. World number one a nih hnuah a zawnin kar 186 chhung he nihna hi a hauh a, kum 2016 khan Serena Williams chuan he record hi a tluk.
Djokovic-a number one nih rei zawn ber hi kar 122 chhung a ni.