- Ruata
Honda Cars India chuan an sedan hmingthang tak City thar tur 2023 Honda City chu ram chhunga dealership hrang hrangah an thawnchhuk tan a. A chi hrang awm tur pawh company atanga official-a puan la ni lo mahse tunah hian report hrang hrang chuan an tarlang tan tawh.
Honda City thar tlangzarh hun tur hi puan a la ni lo a, mahse March 2023 kar hmasa berah hi hralh chhuah a nih a rinawm a, 2023 Honda City facelift thar hi dealer-ah Rs 21,000 pein emaw online in Rs. 5000 chawiin a book theih a ni. A chhuah hun tur hi company lam atanga chiang taka puan a la awm loh avangin media report hi chu a rintlak rih loh maithei a, amaherawhchu a sual tam vak ngai lo a. Honda City thar hi kan hmu thuai tawh dawn tih chu a chiang tawh a ni.
Media report tharin an tarlan danin City model thar hi variant 9 a awm dawn a, trim pali – SV, V, VX leh ZX-ah te a awm dawn a ni. A khawl lamah chuan chi hnih – 1.5L, 4-cylinder petrol leh 1.5L Atkinson cycle, Honda’s e:HEV hybrid tech hmang a awm bawk a ni. A hmasa zawk hian 121bhp power leh 145Nm torque a pechhuak thei a, a hnuhnung zawk hian 126bhp power leh 253Nm torque a pechhuak thei bawk a ni. Transmission lamah chuan 6-speed manual emaw CVT automatic gearbox emaw duhthlan tur a awm a. Hybrid setup hian eCVT transmission a nei dawn a ni.
City hybrid hian petrol litre khatin km 26.5 a tlan thei a, petrol tank khatin km 1,000 a tlang thei bawk a ni. Petrol version pangngai hian petrol litre khatin km 18.4 a tlan thei a. Honda hian RDE (Real Driving Emission) norms lo awm tur avangin 1.5L diesel engine chu a titawp a. Entry-level SV trim thar chu manual gearbox chauh hmanga tihchhuah a ni dawn bawk a, V trim thar chu petrol-hybrid powertrain nen a awm dawn bawk a ni.
A kentel lamah chuan 2023 Honda City facelift thar hian Advanced Driver Assistance System (ADAS)a hmang dawn a. He system hian himna hmanraw hrang hrang – autonomous emergency braking, lane keeping assist leh adaptive cruise control te a nei dawn a. Himna hmanraw dangah chuan airbag 6, hill start assist, tyre pressure monitoring system, stability assist, multi-angle rear view camera, Isofix child mount leh ORVM-a lane watch camera awm te te a nei dawn bawk a ni.
Honda City hi hmanlai atanga sedan mawi leh lar reng a ni a. Tunhnaiah tlemin market lamah a che tha ta lo deuh a. Hetihrual hian tuna midsize sedan zingah chuan a lar pawl leh lei nasat pawl a ni reng a. A elpui tur Hyundai Verna pawh a thar tur hi thawm a awm reng tawh a, tunah hian tlangzarh theih maiin a awm tawh a ni. Company lam chuan a hlawma siamchhuah hna an thawk tan chho dawn a, reiloteah Hyundai Verna thar mawi tak kan hmu dawn a, a landan tur pawh hi official sketch an rawn tichhuak leh tawh a ni.
Midsize sedan huang hi mimal leh sorkar pawhin Mizoramah pawh an lei nasat pawl tak lirthei a ni a. Midsize sedan huangah hian duhthlan tur a tam lo khawp mai a, a duhthlan tur ho zinga mi a thar tha tak, mawi leh changkang bawk si a rawn chhuak leh tur hi thu lawmawm tak a ni a. India rama Honda City ngaina tute tan chuan thu lawmawm tak a ni awm e.