Liverpool in hmabak ko tak an nei ta a, UEFA Champions League round of 16 first leg-ah champion lai Real Madrid an mikhual a. Goal nga chhuahin 5-2 in an tlawm.
Thawhlehni zana Anfield-ah Liverpool hian duhthusam a tha in bul tan mahse inkhel a kal reiin team pahnih inthlauhna a lang a. Chhanlet lohin Real in goal nga an khung.
Nikum final a Paris a intum team pahnihte inkar a inthlau a. Liverpool in bul tan tha mahse Spanish club hi Europe huap inelna lianah Anfield a goal nga khung thei hmasa ber an ni.
Liverpool phawrh mualpho in an awm
Mahni mualah minute li-naah Liverpool in goal an khung a. Darwin Nunez chuan goal fing tak thai lutin hma an hruai a. Minute 10 hnuah Real goalkeeper Thibaut Courtois tihsual zarah Mohamed Salah chuan an goal hnihna a khung nghal.
Liverpool tantute thawm a ring, nimahsela champion lai an an ‘class’ an lantir a. A hmahruaitu chu forward Vinicius Junior a ni.
Brazilian forward in khawvela tha ber zing ami a nihna a pholang. Minute 21-naah goal mawi khungin Real an tho chhuak tan. Goalkeeper chetsual a thleng nawn leh zui a, tun tumah erawh Liverpool goalkeeper Alisson niin Vinicius-a zawnah ball a pe a, Brazilian star in a huntha neih a bawhpelh lo chiang.
Second half-ah inkhel a danglam hle. Luka Modric-a freekick chu Eder Militao chuan tauh lutin bul an tan a. Striker Karim Benzema inlar zuiin minute 55-naah an goal li na a khung a. Minute 67-naah Luka Modric-a thawhrah sengin French striker bawkin an goal hnihna a khung.
Champion leh kan duh
French striker Benzema chuan inkhel zawhah, “Kan huaisenna kan lantir a, he inkhelah hian kan ze dik tak kan pholang. Goal khung thei kan nihna kan tilang a – he inelnaah hian champion leh kan duh.”
“Zaninah player tana inkhel nuam tak kan khel a, a entute mit pawh a tlai hle ang.” tiin a sawi.
A coach Ancelotti chuan inkhel thlak danglamtu Vinicius Junior a fak. “Tun dinhmunah hian khawvel footballah ani tluka inkhel thlak danglam thei hi an awm lo, inkhel result nghawng tura danglamna siam a tul apiangin ani hi dingchhuakin a hlawhtling ziah.” a ti.