European football a striker ngaihven hlawh ber zing ami Victor Osimhen chuan tun season a a goal 20-na a khung a. Napoli in player 10 a inkhel zo Eintracht Frankfurt 2-0 in an hneh.
Thawhlehni zan UEFA Champions League round of 16 first leg inkhel hi Frankfurt a
Deutsche Bank Park-ah khelh a ni a. Napoli chu team hlauhawm zawk hun tam zawk chhung an ni.
Khvicha Kvaratskhelia penalty pet dansak a ni chungin Napoli in first half-ah Osimhen hmangin goal an khung thova. Minute 40-naah Hirving Lozano ball siamsak chu goal-ah a khung.
Second half-ah Frankfurt tan thil ti harsa zual turin an striker Randal Kolo Muani chuan hlauhawm taka a chet avangin red card a hmu.
Minute 65-naah Napoli tan Giovanni di Lorenzo chuan an goal hnihna a khung chhunzawm a. March 15 a an mual a second leg khel tur Napoli dinhmun a tha.
Season duhawm hmang Partenopei
Luciano Spalletti pawlte hian kum engemaw zat chhung season ‘teuh’ an hman fo hnuah kuminah hlawhtlinna an tawngbaw ngei dawn a ang sawt hle.
Italy-ah fal takin league-ah an sang tawh a, point 15 a hma hruaiin paihthlak an huphurhawm tawh.
A zawna vawi nga chak lai niin Frankfurt an hmachhawn a, tlarhmaah an chetranna leh tlanchakna in an khingpuite tan harsatna a siam ngun hle.
A bikin Kvaratskhelia leh Osimhen te an hlauhawm a. Nigeria striker hian first half-ah penalty pawh a hlawhchhuak.
Napoli coach Luciano Spalletti chuan, “Kan inkhelah ka lungawi hle, a tir atangin kan huaisen em em a, kan duhdan ang taka inkhel theiin inkhel kan thunun zawk.”
“Goal khat dang khung a kan dinhmun tihchian theihna kan nei a, khung thei ila a tangkai hle ang. Mahse inkhel vawikhat a la awm a, chuvangin 2-0 nimahsela kan tlin theihna hi 50-50 a la ni.” tiin hmabak an la neih thu a sawi.