Ultimate Fighting Championship chuan bantamweight title inchuh turin champion lai Aljamain Sterling leh champion thin Henry Cejudo te an inhmachhawn tir dawn tih fighter pahnihte hian an sawi.
Contract ziahfel erawh a la ni lova, nimahsela May 6 a intum turin inbiakna a awm tawh an sawi chiang tawh.
UFC lamin hemi chungchang hi la puangzar lo mahse UFC 288 atan a ni dawn niin a lang.
Sterling chuan tunhnaiah, “May 6-ah Henry Cejudo ka hmachhawn dawn a, he chona hi ka hmachhawn chak tawh hle.” tiin a lo sawi tawh.
22-3 record nei Sterling-a’n nikum October thla a champion hlui TJ Dillashaw laka a title a humhim hnuah UFC chuan Cejudo nena intum tir tumin hma a la a. Sterling hi nikum kumtawp lam khan inhliam lo se May thla hma hian thleng hman tura ngaih a ni.
A zawna vawi 8 chak lai Sterling hian kum 2021 khan disqualification hmangin champion a ni a. Thenkhatin a champion dan avangin sawisel thin mahse a title lakna Petr Yahn leh Dillashaw te a hneh leh tawh a ni.
16-2 record nei kum 36 mi Cejudo hi MMA a record nei tha ber zing ami a ni a. Olympic gold-medal wrestler a nih bakah kum 2018 khan UFC flyweight champion a ni a, kum 2019 khan bantamweight champion ni lehin a bantamweight title pawh hi vawikhat a humhim hnuah kum 2020 khan tlawm lovin a retire thu a puang a. Nimahsela kuminah a kir leh dawn a ni.