British MP-te chuan tun hnaia India-a chhiah thuneituten BBC an dap chu ‘tihthaihna’ a nih thu an sawi.
Kar hmasa khan Delhi leh Mumbai pisa chu dap niin thawktu thenkhat chu zanah pawh haw lovin zawhna zawh an ni.
Tun hnai lawka UK-a Indian Prime Minister Narendra Modi demna lam sawiselna documentary tichhuaktu, BBC hian chhui hna chu tha taka an thawhpui thu an sawi.
Foreign Office Minister David Rutley chuan he thil thleng hi ngun taka a ngaihven thu a sawi.
Labour shadow minister Fabian Hamilton chuan Thawhlehnia House of Commons-a sawihonaah mipui rorelna ramah ‘tul lo takin sawiselna chu khap tur a ni lo’ tih a sawi.
Labour MP hian India-in a dap chhan tak hriat a duh thu leh ‘chiang takin engvangin nge thuneituten an dap chhan’ sawi turin a ti.
“BBC hi khawvel huapin an thatna leh an thil puan a rintlakna avanga khawvela broadcaster zahawm tak a ni mek a, tihthaihna leh hlauhna awm miah lovin thil an puan leh chettir remtih ngei tur a ni,” a ti.
DUP-a mi, Jim Shannon pawhin pisa dap chu ‘ram hruaitu lanna documentary tihchhuah a nih avangin tihhlauh tum nana dap’ niin a sawi bawk.
Sorkar chuan Indian High Commission chu hemi chungchangah hian kova insawi fiah tura ti ngei turin a phut.
Conservative Sir Julian Lewis chuan BBC pisa dap chu ‘nasa taka rilrua vei ngai’ a nih thu a sawi ve bawk.
Foreign Office Minister Rutley chuan he thil thleng hi a nihna tak sawi lovin, “Dan anga thiltih hi mipui rorelna ram kalhmang a ni a, media leh thil sawi theihna zalenna pawh chutiang bawk chu a ni,” a ti.
BBC-in documentary a tihchhuah, ‘India: The Modi Question’ tih hi kum 2002-a chief minister a nih laia Gujarat-a Muslim lama tharum thawhna thlenga a chet dan vel tihlanna a ni.
India chuan he thil hi ram chhunga chhuah a khap a, Delhi-a zirlai, an university-a chhuah tumte pawh an man nghe nghe.
India Central Board of Direct Taxes chuan pisa an dap hnuah hian ‘finfiahna rintlak tak tak’ an hai chhuah thu leh ‘fel tawk lova thil kal’ a awm thu an sawi.