China hmar lam, Inner Mongolia autonomous region-a Alxa League an tiha lungalhthei laih chhuahna khur chimah mi pahnih vel an thi a, mi 50 chuang an la tang mek bawk niin sorkar chanchinbu chuan a tar lang.
“Nilaini chawhnua thleng kha a ni a, chhui chinah chuan khur chhungah hian mi 50 chuang tang an la awm a ni,” tiin sorkar news agency Xinhua chuan a tar lang.
Chhanchhuah hna thawktuten mi pathum an la chhuak tawh a, an zinga pahnih erawh an nunna chhan hman an ni lo.
Sorkar chanchinbu dang pawhin chin hriat loh hi mi 57 an nih thu leh lirtheite pawh a chimpui tel tih an tar lang.
Sorkar broadcaster CCTV chuan khur chim hi Xinjing Coal Mining Company-in an enkawl khur luhna niin ‘zau tak’ tiin an puang.
“Thawktu eng emaw zat leh lirtheite pawh a pilpui a ni,” tiin CCTV chuan a puang.
Inner Mongolia hi China-in lungalhthei leh mineral dang a laih chhuahna hmunpui ber pakhat a ni a. Leilung hausakna an lak chhuahnaah hian tlang, phul awihtlan leh thlaler te pawh khuarel an tihchhiat nasat thu an sawi thin.
China-ah hian thil laih chhuahna khura himna hi tun hnaiah hma a sawn hle tawh chungin chhiatna lian tak tak a thleng fo tho va. Thupek kengkawngtute an inthlahdah vanga puh a ni a, a bikin hmun kilkhawrah chhiatna a thleng tam zual.
December, 2020 khan lungalhthei khurah carbon monoxide put a awm avangin a chhunga thawk mi 23 an thi.
January, 2021 pawh khan Shandong province-a rangkachak khura thil puak vangin miner 10 an thi bawk.