Guwahati Police team chuan mipa pakhat, a nu nena thah, a taksa chan sawma an thenawm, Meghalaya-a kawra paih an chhar a. An nufa hian a nupui leh a thiante pahnihin an thah nia an rin thu thuneituten an sawi.
A nu ruang zawk hi February 19 khan Cherrapunji bulah chhar a lo ni tawh.
Meghalaya Police puihna nen Guwahati Police team hian Dawki Road-a Khasi Hills an dap a, hetah hian ‘mi pahnih thahna’ thubuaia ruang hi chhar a ni.
Thawhlehni zingah khan a chhuitu tura din special team chuan an rinhlelh an man mi pathumte hruaiin Meghalaya an pan a, ruang an paihna hmun takah hian an kalpui a ni.
“Hmun hrang hrangah nilengin kan zawng a. Thil lawmawm tak hmuin mipa ruang chan sawm thenkhat kan hmu a ni,” tiin thuneitu sang pakhat chuan a sawi.
Shankari Dey (62) leh a fapa, Amarjyoti Dey (32) te hi nikum July leh August khan a nupui leh a thurualpui mipa pahnihin an that nia hriat a ni.
A nupui, Bandana Kalita (32) chu rinhlelh ber niin a thian tha pahnih, Dhanti Deka (32) leh Arup Deka (27) te nen man an ni.
Guwahati Police Commissioner Diganta Barah chuan thuthar lakhawmtute a kawmnaah mihring taksa peng thenkhat an hmuh hnuah hian police chuan finfiahna chiang tawk tak nen chargesheet rintlak tak court-ah an thehluh thuai theih tur thu a sawi.
Bandana leh Arup hi Guwahati-a man niin Dhanti erawh Tinsukia district-a man a ni thung.
Shankari Dey-i hi July 26 khan a inah phuar betin lukham nen an up hlum a, a ruang chu hmun thumah chanin Meghalaya panin Dhanti-a car hmangin an phur a, an hmanraw hmante nen a tuk chawhma dar 10:00 velah an chhuak a, an paih darh ta tih police chuan an sawi.
August 17 khan Bandana-i leh a thiante hian Amarjyoti chu an nupaa an chenna, Narengi-a an inah thir tlawn hmangin an bei leh a. A thih hnuah a ruang hi hmun ngaa chan darhin a hmaa an tih ang bawkin a ruang chu an thehthang leh a ni.