Rural Development Department Minister Lalruatkima’n in nei lote tana insak tanpuina, Pradhan Mantri Awaas Yojana (PMAY) Gramin hnuaia tanpuina dawng chhungkaw 6,069-ten in an sak zawh tawh thu house a hrilh.
Nimin assembly session-a Thorang bialtu MLA Zodintluanga zawhna chhangin RD minister chuan PMAY Gramin hnuaia in sak tanpuina 1st Installment dawng tawhte chu central atanga sum an dawn mil leh state treasury-in sum a pek chhuah ang zelin pek chhunzawm an ni dawn tih a sawi.
In sak tanpuina dawngtute chu installment lia sum pek an nih thu sawiin, “1st Installment dawng tawh chhungkaw 14,862 an awm a, second installment dawng tawh chhungkaw 7,966, 3rd instalment dawng tawh chhungkaw 6,493 leh a hnuhnung ber, 4th installment dawng tawh chhungkaw 5,650 an awm,” a ti.
Sum la dawng kim lova in sa lai mek chu chhungkaw 14,443 an awm tih sawiin, in sa zo tawh chhungkaw 5,650 awmin, tanpuina dawng tur, sum la pek loh hrim hrim chhungkaw 5,650 zet an la awm tih a sawi.
RD minister chuan PMAY Gramin hnuaia tanpuina dawngtute sum dawn tur zawng zawng chu Rs 1,30,000 a ni a, tum thum, Rs 30,000 theuha pein a tawpah Rs. 10,000 pek an ni tih a sawi a, sorkar laipui hian tanpuina sum an pek chhuah dan chu a chhangkhât hle tih a sawi.
Tanpuina dawngtuten in an sak chhunzawmna tur sum an dawn leh hmain an hmanraw thenkhatte chu a lo chhe hman tih a sawi a, heng harsatna sukiang tur hian state sorkar chuan theihtawp chhuahin hma la mah se, he scheme hnuaiah hian thuneihna a neih loh avangin a buaithlak hle tih a sawi a ni.