Aizawl:Mahni Thlai Thar Zuar Pawl (MTTZP), Mizoramin nimin khan Sairang Branch YMA Hall-ah assembly vawi 6-na an hmang.
MTTZP inkhawmpui hi an president, Laltlanzovi’n a kaihruai a, khuallian, Prof. Lalrindiki Ralte, ATC chuan MTTZP member-te chu Zofate thlai ei tur tharlâm leh hrisel petute an nih avangin ram tan an pawimawh hle a, an eizawnna kawnga hma an sawn zel theih nan ram hruaitute pawhin ngaihsak zual zel thei se a duh thu a sawi.
An pawl hmalak hrang hrang report petu, General Secretary Lalhlimpuii chuan Aizawl New Market building sak mek a nih avangin an member eng emaw zat chuan chawhmeh zawrhna hmun an nei lo a, ei leh barah harsatna an tawh phah nasa hle niin a sawi a, tuna market building sak mekah hian chief minister-in an inzawrhna tur hmun pek a lo tiam ve tawh thu leh a intiamnate chu thu chauh ni lova a taka a hlen ngei an beiseiin an duh hle tih a sawi.
MTTZP hi August 10, 2011 khan din a ni a, Mizoram hmun hrang hrangah unit 23 awmin member hi mi 1,000 chuang an awm a ni.