Aizawl: Mizoram Upa Pawl (MUP) Thenzawl Area-in Vantawng Group YMA Run, Thenzawl Bazar Vengah nimin khan conference hmangin Thenzawl leh a chhehvel tan Mizoram sorkarin district headquarters thar siamsak se an duh thu leh siam a nih theih nan demand committee din leh Thenzawla College din a nih theih nan hmalak an rel.
Thenzawl Area MUP Conference hi an president, R. Hmangaihzualan kaihruaiin an member thite sunna hun an hmang a, conference hi khuallian, District Social Welfare Officer, Aizawl East F. Lalngaihawmi’n hmanpuiin tar pension chungchanga hriat tur pawimawh hrang hrang sawiin, eng emaw bik riau harsatna, mitdel, rualbanlo ang chite an nih loh chuan Aadhaar nei lo tan lak theih a nih tawh loh thu a sawi a, kum upate an hlu tih sawiin, an theihtawpa tan la zel turin a fuih.
Chawhnu lamah rorel inkhawm neiin an thurel pawimawh zingah Thenzawl district thar din an duh thu bakah Thenzawla college din an duh thu leh MUP inkaihhruaina pawimawh hrang hrang a tel.
Rorel zawh hian Thenzawla chanchinthar thehdarhtute kaihhruainain hruaitu thar thlan a ni a. Ruai an theh nghal a ni.
Thenzawl Area MUP hnuaiah hian Thenzawl khaw chhunga branch pariat leh Neihloh, Buangpui, Kanghmun South leh Zote South te an tel a, member 1,016 awmin, kum 90 chung lam mi 19 leh kum 80 chung lam mi 121 an awm mek a ni.