Premier League club Manchester United hnena loan a khel mek Marcel Sabitzer-a agent chuan English club hnenah hian a nghet a insawn lam a sawi bo duh lova. A player chuan England a inkhelh nuam a tih thu a sawi.
Austrian midfielder hian January thla khan loan in thla ruk chhung atan Erik ten Hag-a team hi beisei loh takin a zawm thut a. Old Trafford-ah hian bul tan chhe lovin team-ah mi tangkai a ni nghal.
United tan hian match li khel tawhin heng zingah hian match thumah bul a tan a. Midfield-ah mi tangkai niin a agent Roger Wittmann chuan Premier League a inkhelh chu nuam a ti a, nipui lamah a nghet a insawn theih dan kawng a awm leh awm loh an en vek tur thu a sawi.
Wittmann chuan, “Marcel hi player tha bik zing ami a ni a, England-ah a che tha nghal mai hi thil mak a ni reng reng lo.”
“Ani anga tawnhriat ngah tawh nih chuan thil thar a ni lova, Champions League-ah a ni emaw, ram tan vawi 60 chuang a inkhel tawh bawk a, hetiang tawnhriat nei tan chuan club thar leh league thar a insiamrem nghal mai hi thil harsa a ni tawh lo.”
“English football rorumna hi a ngaina a, Premier League a khel chi tak a ni dawn tih hi a chiang nghal. Player huaisen leh rorum a ni a, a theihna ang tak hman a nihna league-ah a inkhel a ni.” a ti a.
“Manchester United-ah hian RB Leipzig a Marcel ang kha kan hmu leh a, hlim taka a inkhel han hmuh leh thei hi ka lawm hle. Nipuiah chuan eng nge thleng dawn tih kha chu, a hun lo thleng phawt se kan hre zel ang.” tiin a insawn theihna tur kawng a hawng.
Bayern Munich atanga England pantu kum 28 mi hian United midfield-ah Christian Eriksen inhliam vang leh Casemiro hrem tawh vangten hmun pawimawh tak a luah mek.