Inter Milan tan substitute bench atanga dah luh striker Romelu Lukaku chuan inkhel a goal awmchhun a khung a. Player 10 a inkhel zo FC Porto lakah 1-0 in UEFA Champions League round of 16 first leg inkhelah hnehna an chang.
San Siro a Nilaini zana inkhelah Belgian striker hian minute 86-naah goal a khung a. Goal ban a tihper hnuah ball per let chu nang fuh lehnghal in a pet goal.
FC Porto in goal an khung teuh ve hle bawk a. Inter goalkeeper Andre Onana chuan goal an khung hma in Zaidu Sanusi leh Mehdi Taremi te lakah a zawna save tha tak siam a nei a. Porto tana inkhel ti harsa zual turin Otavio chuan yellow card a hmuh nawn avangin minute 78-naah khelmual a chhuahsan a ngai.
Inter hi chak mahse an hmabak a la zo lova, March 14 hian Estadio do Dragao-ah second leg an khel leh ang.
Inter chakpuitu chu
Kum 29 mi striker Lukaku hian Chelsea atangin tun season atan loan in a hlawhtlinna hmun Inter Milan a pan a, a beisei ang erawhin hun a hmang lo.
Inhliamin a season a tihbuai avangin a inkhel tam thei lova, tun season-ah pawh vawi 14 bak a la inkhel thei lo.
Hei vang hian Lukaku hian season harsa a hman karah sawiselna a tawk leh thin a. Kar hmasa khan Inter Milan hotupa in a rit lutuk tiin inkhel bul a tan loh chhan a lo sawi tawh.
Porto lakah erawh ngai a awh chho tan tih lantirin a ball tauh per let nang fuh turin a che rang ber.
Inter hian chance tha dang an nei nual a. Alessandro Bastoni tauh goal tur Diogo Costa save a fakawm a. Hakan Calhanoglu leh Lautaro Martinez te pawhin goal an khung teuh.
Inter manager Simone Inzaghi chuan, “Thahrui ngah tak team, tharum hman thiam tak team lakah kan kheltha viau. First half a kan chance tha neihte kan khung theih loh kha a pawi a, second half-ah counter-attack atang khan harsatna min siam bawk. Mahse substitution kan siam fuh a, kha khan inkhel a thlak danglam.” tiin a sawi zui