UFC lightweight champion hlui Charles Oliveira chuan May thla hian lightweight fighter zinga rankings sang Beneil Dariush a hmachhawn dawn.
Ultimate Fighting Championship chuan he 155 pound bout hi la puang chiang lo mahse OIiveira hian a social media kaltlangin a thleng dawn tih a sawi a. Hmun thenkhatah Dariush-a lam pawh hian an remti tawh niin an sawi.
UFC 288 a thleng tura ngaih a ni a, 33-9 MMA record nei Oliveira hian October thla a tuna lightweight champion Islam Makhachev laka a tlawm hnua a inlan leh hmasak ber a ni dawn.
Hemi a a tlawm hma hian a zawnin vawi 11 a chak hman a ni.
Kum 33 mi 22-4-1 record nei Dariush hi lightweight rankings a no. 4 hauhtu a ni mek a, a zawna vawi 8 chaklai niin UFC title chuh tur zingah a buk a ti rit sawt hle a. Oliveira hi a hneh a nih chuan a tan title fight a thlen ngei a rinawm tawh hle.
UFC 288 hi a neihna hmun tur puanzar a la ni lova, bantamweight title fight-ah Aljamain Sterling leh Henry Cejudo te intum tur chu main event a ni ang.
Hetihlai hian April 22 a Fight Night neih turah UFC chuan heavyweight fighter pahnih Sergei Pavlovich leh Curtis Blaydes te a intum tir dawn.
17-1 MMA record nei Russian fighter Pavlovich hi UFC a a inlan hmasak berah tlawm mahse a zawnin vawi nga a chak mek. 17-3 record nei Blaydes hi a zawna vawi thum chak lai a ni thung.