Manchester United in second half-ah inkhel thlak danglam turin football an khel a. An tum angte ti hlawhtling theiin Barcelona chu 2-1 in an lehthal a, Europa League round of 16 an inhlangkai.
Ningani zanah Europa League Playoff Round second leg khelh a ni a, Old Trafford-ah Barcelona lenglutin first leg-ah 2-2 in an inhnehtawk tawh. Barca in goal khung hmasa mahse United tho leh an veng zo lova, 4-3 aggregate in an tlawm.
United an nung
Club pahnihte hian tunhnaiah season harsa an hmang ve ve a, tun season-ah erawh hmasawnna an nei nasa ve ve. A bikin Manchester United in an manager ropui Sir Alex Ferguson chawlh hnuah hun ropui an tawng thei meuh lo.
Tunah coach Erik ten Hag hnuaiah an hmabak la thui hle mahse kawng dik an zawh nia ngaihna a lian tulh tulh a. Barcelona laka an fiahna paltlang thar ber pawhin a ti awm ang zual.
United hian first half-ah Barcelona an thunun thei lova, Spanish team in ball thunun zawkin hlauhawm tam siam lo mahse United in hmunawl leh remchang an ngah lo.
Minute 18-naah United in penalty an chawi a, Bruno Fernandes chuan Alejandro Balde lakah penalty a chawi, United tantute tan penalty nem tak a ni ang.
Robert Lewandowski chuan penalty a khung a. 1-0 in hma an hruai.
Halftime zawhah United an insiamrem. Dinglamah Antony dahluh niin Wout Weghorst lakchhuah a ni a, striker hnung a midfield hmawr luah turin Bruno Fernandes a laiah an nawr phei. Awmzia a awm nghal.
Minute 47-naah United insiksawi in hmunawl a siam a, Brazilian midfielder Fred chuan tihsual nei miah lovin an si phurh a sut.
United in hmunawl tlanna tur an ngah sawt a, an tlanchak thei zawk bawk. Football rang khelin Barcelona an tihthaih fova. Minute 73-naah Antony hmangin chakna goal an khung.
Huntawp dawnah Rafael Varance chuan United goal chhuah tur a veng hman a, a bak erawh Barca in hlauhawm langsar an nei lo. A sen lamin chak an phu a, an result-ah an lawm.
A zawna match 18 tlawm lova kal tawh Barcelona hi October thla hnua a vawikhatna atana an tlawmna a ni a. Kum 1998-1999 season hnua round of 16 thleng pha lova Europe huap inelna atanga an tlak hmasak ber a ni bawk.
Inkhel zawh lam
Manchester United manager Erik ten Hag chuan, “Inrintawkna lian neihna turin ruahmanna tha neih a ngai. Chutihrualin result tha neih a pawimawh thin bawk. Zanin hi hemi kawngah hian kan tan ke penna pawimawh tak niin ka hria. Europe a team tha ber nilai zing ami Barcelona hneh hian inrintawkna lian tak min siam ang.” tiin a sawi.
Barcelona manager Xavi chuan, “Nikumah Europe huap inelnaha kan inlan thei lo. Kuminah Bayern, Inter leh United te kan elpui thei. Hma kan sawn a ngai a, a aia tha zawka kan kir a ngai.” a ti.