PC party President Vanlalruata’n “leiba engto lo Chief Minister kan hrawn hi a vanduaithlak” a ti.
PC party President chuan nimin khan Mizoram state budget chungchangah thuchhuah siamin, “Budget thar atâna sum ruahman Rs vbc 14,209 .15 zînga Rs. vbc 2,723.32 chu pûk tûr a ni” a ti a. “Neihin a tlin miau loh chuan puk loh theih ni hek lo, kan bat belh zel a. Mahse, pu ber engto tham kan la ba lo” a ti.
Vanlalruata chuan “Budget kan sawi hian budget ruahman thar hi kan sawi ber thin a, mahse, budget thar hi chu ruahmanna mai a nih avangin a dik thei lova. 2023-24 budget pawh hi ruahmanna, rinthu mai a ni a, kum kallai 2022-23 budget pawh hi a tak a la hriat loh a, ennawn hnu (revised) chauh a la ni” tiin, “A tak hriat tawh chin chu 2021-22 leh a hmalam kha a nih avangin tuntumah hi chuan a tak chin atangin thlir a ngai a ni” a ti a. Sor- kar kum tawp, March ni 31 zela tunhnai kum 5 chhunga Mizoram state leiba neih dân hetiang hian a tarlang :
2017-18-ah
Rs. vbc 7,300.30
2018-19-ah
Rs. vbc 7,315.54
2019-20-ah
Rs. vbc 8,678.26
2020-21-ah
Rs. vbc 9,881.09
2021-22-ah
Rs. vbc 10,570.93
PC President chuan “Kan leiba hi kan budget nen a inzât thuak thuak a ni” tiin, “Kan leiba hi chi hnihah then a ni a, a pakhat zawk chu pûk, hunbi neia rulh ngai, public debt an tih hi niin, hetah hian financial institution hrang hrang atanga kan puk leh central sorkar ata- nga puk a awm hrang leh” a ti a. “A pakhat zâwk chu pung nei leh nei lova sorkarin a peklet leh ngai hrang hrang niin, liabilities on public account tih a ni a, hetah hian chi hrang hrang – sorkar hnathawk ho provident fund tlingkhawm te, pension fund te, civil deposit te, savings leh reserved fund etc. te a awm hrang leh a. Hei pawh hi a hlawmin kan tarlang ang a, heng hi erawh chu hunbi neia rulh ngai ni lovin sum awmdan leh a lalettu tûrin a dil dân mila pekchhuah ngai a ni” a ti.
Vanlalruata chuan “Leiba te hi a pung pawh a inzat lova, kum 2021-22 kumt- awpa a pung rate cha- whrual chu 10.15% a ni” a ti a. Leibate chu thensawma a dinhmun hetiang hian a tarlang :
- Puk (public debt):
2017-18-ah
Rs. vbc 3,334.28
2018-19-ah
Rs. vbc 3,224.27
2019-20-ah
Rs. vbc 4,018.03
2020-21-ah
Rs. vbc 5,011.45
2021-22-ah
Rs. vbc 5,636.93 - Peklet ngai (pub- lic account liabilities):
2017-18-ah
Rs. vbc 3,966.02
2018-19-ah
Rs. vbc 4,091.27
2019-20-ah
Rs. vbc 4,660.23
2020-21-ah
Rs. vbc 4,869.64
2021-22-ah
Rs. vbc 4,934.00
“Heng bâ te hi a pung rulh reng a ni a. A pung rulhna atan 2020-21 ah Rs vbc 400.98 hman niin, 2021-22 ah Rs vbc 450.64 hman a ni a; budget tharah Rs vbc 662.23 hman tura ruahman niin, nakumah Rs vbc 715.21 hman ngai tura ngaih a ni” Vanlalruata chuan a ti.
“Kan leiba (a capital) te hi a hmin (mature) hunah rulh a ngai bawk dâwn a. Hemi nêna chhiar telin 2020-21 ah ba rulhna atana hman zawng zawng Rs vbc 3,760.96 a ni a. Hemi hma kuma hman chu Rs vbc 2,914.45 a ni” tiin, “2020-21-a kan leiba zinga Rs vbc 1,945.08 hi hemi kum atanga chhiara kum 5 ral hmaa rulh zawh vek ngai a ni a. A pumpui hian kum 7 ral hmaa rulh zawh vek ngai a ni” a ti bawk.
PC President chuan “Kan sum dinhmun a thatloha, inrelbawlna senso pawh kan indaih mang loh avangin leiba rulhna tur hi puk a ngai hial tawh a, hei hi leiba thang (debt trap)-ah kan tang kan tih thin chhan a ni” a ti a. “Tuna kan kal dân atanga chhût thuak hian kum 5 lo kal leh turah chuan ba rulhna atan Rs vbc 10,000 vel kum khatah kan mamawh tawh dâwnin a lang” a ti. “Heta kan leiba tarlan bakah hian kan sorkar ni chiah lo, midang tia sawi mai turin loan an lâk, an rulh theih loh palha kan sorkarin a rulh ngai tur Rs vbc 100 chuang a awm” a ti bawk a ni.