Aizawl: Nimin khan MPCC-in Friday Political Session an nei a, he hunah hian Dr. C. Lalengzama, Asst. Professor, Department of Social Worker, Mizoram University-in ‘Mizoram Loneitute Eizawnna; An harsatnate leh hmalak Dan tur’ tih thupui a zirtir a. MPCC Vice President Lal Thanzara’n mithar lawm luhna hun a hmang bawk.
Dr C Lalengzama chuan thingtlang lo neih atangin huan lo ram nghet neihah Mizote an insawn mek tih a sawi a. NLUP-in thingtlang lo neih a tihtlakhniam bakah lo neih tihhmasawn a nih loh avangin hlawk si loa lo neih leh huan siam aiin inhlawhna zawngin an kal niin a sawi.
Ram leilung rualrem lo a tam avang hian lo neihna lamah harsatna a siam a, hemi harsatna mila hmanrua lak leh ruahmanna siam thiam a ngai nia sawiin Dr C Lalengzama chuan, “Tual chhunga hralh chhuahna mumal tak siam hi khawvel huapa kan inpho chhuahna kal kawng pawimawh a ni,” nia sawiin, entrepreneurship hian agricultural lam a hawi a pawimawh thu a sawi.
Dr C Lalengzama hian lo neih hmasawnna lama beisei anga hma sawn loh a nih chhan chu sorkar department-te thawhhona a that tawk loh vang niin a sawi a. Mumal taka tharchhuah hralhna tur ruahman a tul tih a sawi a, “Election manifesto-a kan neih hian kan ti tha a ni lo, kan tih tur sa kan ti tan chauh a ni,” a ti.
MPCC Vice President Lal Thanzara pawhin thu sawiin, thalai rilru fim leh ngaihtuahna nasa tak hmangtuten sorkar tha siam tura Congress party an zawm zel hian, Congress party-ah mipuiin rinna an nghahzia tilangtu a nih thu a sawi a. “Ni tin Mizoram tana sorkar tha kan siam hun a hnai zel a ni,” a ti.