Aizawl: Education Minister Lalchhandama Ralte chuan sorkarin muster roll zirtirtu 881 a lakte provisional employee-a dah an nih ve theih nan department-in rawtna an siam thu house a hrilh.
Nimin assembly session-a MNF member Dr Vanlaltanpuia zawhna leh member dangte zawh belhna chhangin education minister chuan MR zirtirtute chu services awmze nei zawkah dah an nih theih dan tur sorkarin a en chho mek a, department-in rawtna a thlente chu tunah hian examination stage-ah a awm mek tih a sawi.
MR zirtirtute chu MR skill 2 pay scale pek an nih thu sawiin, thla khatah Rs 15,000 an hlawh tih sawiin, an hlawh tinpun a theih leh theih loh chungchang zawhna pawh chhang telin, LESDE-in tunah hian minimum wages ennawn turin rawtna an siam mek a, cabinet agenda-ah pawh a luh thuai an beisei thu leh hei hian an hlawh tur pawh a nghawng chho tura an ngaih thu a sawi a ni.
Education Minister Chhantea chuan MLA-ten an huam chhunga sorkar enkawl la ni lo zirna inte dinhmun sang zawka hlan kai an duh chungchang an sawite pawh department-in a ngaihtuah chho zel tih a sawi a, hemi chungchang hi council minister thutkhawmah pawh an thlen tawh a, tun hnaiah pawh department-in a tahtawla zirna inte upgrade theih an nih nan rawtna an thlen leh mek thu a sawi bawk.