Minister Dr R Lalthangliana chuan doctor-ten thingtlanga awm aiin Aizawla private hospital-a awm an duh zawk a, doctor lak tur an vân avangin Mizoramin harsatna a tawk tih a sawi.
Ningania Budget session-ah Minister Dr R Lalthangliana demand sawihonaa a hmawrbawktuah tangin, a department chan, health department chungchangah doctor indaih loh thu a sawi a. Member-ten an bialah doctor an indaih loh thu an sawite chhangin, “Thingtlanga awm aiin Aizawla private hospital-a awm an duh zawk,” a ti.
Dr R Lalthangliana chuan doctor lak tur an vân avangin Mizoram harsatna a tawk nia sawiin, thingtlanga thawk tur doctor an sawi tluk theih loh thu leh, Aizawlah vel bawk lo chuan an insawm tluk theih loh thu a sawi.
An sorkar hnua an dinhmun a sawi danin Dr R Lalthangliana hian, kum 2019 hnuah doctor hi 22 an pension a, mi pali boralin, PG zirin mi 25 an chhuak a, doctor 51 nei lo duak ang an nih thu a sawi.
Higher & technical education minister hian zirna in sangte tehnaah Mizoram hi India ramah a sang ber tih a sawi a. Mizoramah UGC recognised zirna in 23 a awm thu leh chung zinga 19-te chuan National Assessment & Accreditation Council (NAAC) valid accreditation an nei tawh tih a sawi a. India ramah hian Mizoram hi mark hmu sang ber nia sawiin, “Mizoramin mark 83 a hmu a, a dawttu Chandigarh-in mark 60 an hmu,” tiin Mizoram achievement a chhuan thu a sawi bawk.