Nimin Assembly Budget Session-ah eptu member pahnih resolution put luh chu lungrual taka pawm a ni.
ZPM Legislature Party member Lalchhuanthanga resolution put, ‘Kawngpui leh building tha kan neih theih nan tun aia ulukin hna thawh ni rawh se,’ tih a ni.
Resolution pu luttu chuan kawng leh building tha leh tlo neih chu hmasawnna atana thil pawimawh ber a ni a, Mizorama inkalpawhna kawngpuite a chhiat chhan ber chu a hmu tur hriat saa hna inpek, mi hminga hnathawh leh hna hralh chhawn a tam vangah a ngaih thu a sawi a, kawng tha siam leh building rotling sak kawngah ngaihtuahna thui tak sen a tul tawh tak meuh meuh tih a sawi bawk.
He resolution hi member pasarihin an sawi ho a, rorel lai lam atanga dingten sorkar hmalaknate an sawi bakah resolution chu pawm ngei tha an tih thu an sawi tlang vek a. Hemi hnu hian Speaker Lalrinliana Sailo kaihhruaiin member-te chuan Lalchhuanthanga resolution put luh chu lungrual takin an pawm zui a ni.
Hemi hnu hian Congress member, Lalrindika Ralte resolution put luh, ‘Kan ram thenawmte atanga sahimna zawnga rawn raltlante hi kan sorkar hian an awmna tur siamsakin duat takin enkawl se, awmkhawmna tur hmun bik ngaihtuahsak rawh se,’ tih chu sawi ho leh a ni.
Resolution pu luttu chuan, “Kum zabi 21 kan chuan kai tawh hnuah pawh mahni mihringpui, an khua leh tuite pawhin tuar mah se pawi ti lo khawpa thuneihna thlahlel an awm hi pawi ka ti,” a ti a; a tuartute zingah Zohnahthlak an tel chu vanduaithlak a tih chu leh an thlavang hauh ngei a tul thu a sawi a, an ni tuamhlawmnaah hian Mizoram sorkarin hma la ngei se ram leh hnam tan a tha dawna a hriat thu a sawi.
Congress member resolution put luh hi member 13-in an sawi ho a, a sawitute hian pawm ngei an duh thu an sawi a, rorel lam atangin raltlante tana sorkar hmalakna hrang hrangte pawh sawi chhuah a ni a, resolution chu a thu tihdanglam rawt a ni bawk.
Speaker Lalrinliana Sailo kaihhruaiin resolution a thu tidanglam tura rawtna lut, ‘Kan ram thenawm, Myanmar leh Bangladesh atanga sahimna zawnga kan unau raltlana lo kalte Mizoram sorkar leh Mizoram mipuiten tha taka kan lo dawngsawng hi a lawmawm kan ti a, a tul ang zela lo tuamhlawm chhunzawmin an awmna tur leh an mamawhte ngaihtuah zel ni rawh se,’ tih chu lungrual takin pawm a ni.