Aizawl: Fisheries Minister K Lalrinliana’n Kolasib Dumlui-a chakai farm-ah chakai 1,900 vel awm anga chhut a nih thu leh farm-ah hian hmasawnna hmuh tur a awm thu a sawi.
Budget session neih mekah member-te zawhna ziaka chhan chi chhangin fisheries minister chuan chakai farm atan Rs 39,00,000 sen a nih tawh thu leh sumte chu SEDP scheme atanga hmuh a nih thu a sawi a. Chakai khawina tur cemented pond pathum siam zawh tawh a nih thu leh dil pindanna leh chakai tawm himna tur te, chakai eitu laka venna tur pal te, chakai chaw dahna tur te leh tui lum lutuk tur venna atan dil chung te zar a nih thu sawiin, “Tun dinhmunah chakai 1,900 vel an awm anga chhut a ni a, farm-a chakai khawite hi hralh chhuah a la ni lo,” a ti.
Fisheries minister chuan chakai farm-ah hian hmasawnna hmuh tur a awm thu leh chakai dahte chu farm chhung environment-ah an insiam rem tawh thu te, an inthlahphung thei tih an hriat theih tawh thu te a sawi a. He project hi pilot project anga kalpui mek a nih thu leh chhunzawm zel tlak a nih leh nih loh erawh hriat theih a la nih loh thu a sawi.
Sanghapui khawi chungchang zawhna pawh chhangin fisheries minister chuan sangha chi tha neih a nih theih nan sanghapui khawi tuma hmalak mek a nih thu a sawi a. Mizoram pumah sangha chi siamna, hatchery mi mal leh society te hnenah 29 pek chhuah a nih tawh thu a sawi bawk.