Mizoram khawpui, Aizawlin February 25, 2023 khan kum 133 a tling a, Aizawl din champha hi khawpui enkawltu, Aizawl Municipal Corporation (AMC) buatsaihin kawng hrang hranga lawm a ni.
Aizawl din champha lawmna pui ber, Aizawl Fair chu February 22-25 chhung khan Sipai Lammuala hlawhtling taka buatsaih a ni a, mipuiin an hlut hle. Mizorama fair/exhibition awm tawhah stall tam ber tum niin stall 92 hawn a ni.
Aizawl Fair-ah hian Mizo thalai tam tak, mahni kea din tum, sumdawnna bultan tir leh eng emaw chen hma lo la tawh tam takin stall an luah bakah, bank lam thlengin mipui tan dawr theih an ni a, Apex Bank-in ATM thlengin an chhawp a ni.
Sorkar laipuia mi harsa dawmkanna tur scheme hrang hrang kalpui thin ministry hrang hrangte pawhin Aizawl Fair hi an ngaihven a, a tir atanga a tawp thlenga thutchilh pawh an awm hial.
Aizawl Fair-ah hian Mizo Photographers Society-in thlalak hlu leh nalh tak tak an pho chhuak a, carnival leh naupang infiamna leh intihhlimna chi hrang hrang pawh buatsaih a ni.
Aizawl Fair buaipui tur hian Aizawl Day Organising Committee chuan mi paruk awmna sub-committee a din a, Corporator David Zohmangaiha’n kaihruaiin Aizawl Day Run pawh an buaipui tel bawk.
Aizawl Fair buaipuitu sub-committee-in theihtawp an chhuah zarah stall eng emawzat chu sorkar laipuia Ministry of Micro Small & Medium Enterprises hnuaia National Small Industries Corporation-in an sponsor nghe nghe.
Aizawl kum 100 tlin hriatrengna lungphunte siam lo ni tawh mah se Aizawl khawpui din champha hi a hranpa taka lawm a ni ngai lo va. Aizawl khawpui enkawltu, AMC-in Aizawl din champha, February 25 chu Aizawl Day tia vuahin kum tin lawm turin ruahmanna a siam a ni.