- Zirsangkima
Maringa chuan, ‘Vawiinah U Sàwma pa’n vidiau kaset (video cassette) a hawh a niang, a rawn hàwn—ka hmu. Zaninah an chhuah ngei ngei ang. Ka’ r’u en díl ang u,’ sí hluam hluam chunga a ABC (hai-um) ei zawhna káwr a lip tawh fawh pah chuan a rawn ti hluam hluam a.
A kianga thu Rualthana chuan, ‘Hei! Maring, fâwp zo vek bîk lo la … phakar thei si!’ tih pahin Maringa ABC káwr fawh lai chu a phih thlâksak thuai a; a fâwp fê zui ve nghâl a.
Hemi zàn hi Inrinni zàn a ni. Anni thianzaho chu an sikul, Primary School II hnungah an thu khâwm a. Zan lama TV enna tùr chungchángah ro an rél mék a ni.
‘A … kei chu, en an phal pawh ka ring chiah lo. U Kima a awm àwm si lo a.’ Sánga chuan a ti bai bai a. A kekawr iptê atang chuan kalkawnga mi meizial bung paih a chhar chu a pet a; a Horsehead nawalh chuan a tan nghal a.
An thianzaho boss U Kima an tih hi TV neitute chhúngkua, Sàwma te lamhnai a ni a; ani a tel tawh hi chuan an ina TV en chungchángah buaina an tâwk ngai lo rêng a ni. Mahse, tun tumah hi chuan a telpui hman tlat lo!
Ramtea chuan, ‘Nge an phal loh ngawt ang a? U Kima chu kan boss tih U Sàwma chhúngten an hre vek tho alãwm … an phal àwm chiang e… An phal loha tíka tákah! An phal loh chuan Sai 10 pawh ka ngam ang!’
Sánga chuan, ‘Nih, an phal loh vaih aw…’ a ti a.
Ramtea chu a confi’ laklawh tlat, ‘Phal khawp ang. TV en pawh keima’n ka díl ngam sak!’ a ti ta hmak mai!
A thian dangte chuan, ‘Nih leh “hlen chil char” aw?’ an ti rual that a.
Ramtea tán zàm ngamna chi a ni tawh lo, ‘Hlen chil chàr e…’ a ti ta!
‘Hlen chil char! Lungpui seh keh rap! Lâk leh dawna êk in khura thlâk! Sai leh Pathian ngam! Samzai khata belpui vuak keh! |hingthi chunga vàna uite vár lâk! Hlâwk laia bàn—kheimit chhut! Nang vàn deh, kei lei deh! Thih sak pawh ka ngam … aw?’ mi dang zawng chuan an ti rual that that a.
An han ngawih leh hnu chuan Lal-Petera chuan, ‘Eng flim (film) nge ni ang le aw…’ a rawn ti bai bai a.
Lalthana chuan, ‘Kei chu Charlie Chaplin flim ni lo se ka ti. Â pa’n en a phal tawh lo a…’ ngui deuh ruai hian a rawn ti chhuak hlawl a.
Mi dang chuan ‘Ngati nge? Nuihza flim pawh han en phal loh? Ho ê…’ an ti hlawm a.
‘In hre ve lo ‘mi? A flim-ah pawh an tawngtír duh tawh miah lohna chhan hi? Mi an nui hlum nasa tawh lutuk a, a tawng rîk an phal tawh lo alãwm. Music-in an tih hnan daih tawh hi…’ tiin Lalthana chuan inti hre bîk niàwm takin a thiante chu a’n hrilh a.
Rualthana chuan, ‘Kei chu, Buds Bencer and Tenre Sheel (Bud Spencer and Terence Hill) ten ka nuih an ti za zâwk fí,’ a rawn ti a.
Chutah, an zínga inti fing ber leh an thianzaho zínga páwl sáng ber, kum 12 mi, páwl thum lai zir a nih tawh avànga a thu sawi apiang an awih thin, Zawrhs-a (George-a) chuan, ‘Kei chu Liaurel (Laurel) and Hardy ten,’ a rawn ti ve leh a.
Lal-Petera chuan,‘Kei chu Charlie Chaplin-a flim-a an tawngtír duh loh chhan kha ka awih! Mahse, U Sàwma pa chuan Charlie Chaplin flim chu a hawh ka ring miah lo. Kungfu tho a ni ang. Bruce Lee ni se aw…’ a ti vawng vawng a.
‘E! Lal-Peter, i ek-sawr-sais (exercise) bu, a káwma Bruce Lee-a thlalâk chuang kha tu leisak che nge? Khawia mi nge?’ tiin Maringa chuan a’n zâwt a.
‘Vai rama mi. A’n Te-i’n Vai-dut (Vayudoot)-a India ram a fan kual tuma min rawn hawn,’ tiin intih theih hmèl deuhin a chháng a.
‘Ka va’n duh ve e… Mikado No. 2 hlîr ek-sawr-sais (exercise) bu ka nei a … Â nuten Pioneer ek-sawr-sais bu hman an la phal ve bawk si lo a…’ Maringa chuan a ti bai bai a.
Mi dang chuan U Sáwma pa vidiau kaset hawh chu Bruce Lee ni se an tih thu an sawi ve tliar tlair hlawm a. Maringa chuan, ‘Kei chu, “Under the Dragon” (Enter the Dragon) flim ni se ka ti. Ka en ve châk e…’ a rawn ti ve leh a.
An zinga Vanglaini, Mizo Arsi te leh Sakeibaknei chanchinbu te pawh bih ve zeuh zeuh thin awmchhun, Zawrhs-a bawk chuan, ‘En teh u, Bruce Lee kha a la thi miah lo maw le! Hmanniah chanchinbuah pawh ka chhiar vek. “Himalaya tlánga pûk pakhatah a chêng mék. An phùm kha chu amah ang deuh tùra hlum hmanga an siam chawp mai mai,” an ti,’ a rawn ti ta! Mi dang chu an hawi tang hrá hlawm mai.
Inti fing ve tho Ramtea ngaih dàn a ni vak lo. ‘Ka awih lo sawh beh!’ a rawn ti.
Mi dangho chuan Ramtea lam chu an hawi thap a. ‘Nge i awih lohna chhan chu?’ an ti a. Sawi tùr a hre leh lawi si lo a!
Rualthana chuan, ‘Duh leh awih pît rawh. Kei chu Bruce Lee hi pui ka ti e… Buhfai quintal khat hi ceiling déng dawtin a pêt kãng thei a nia aw…’ tiin Zawrhs-a thlavãng chu a rawn hauh a.
Chutah Sánga chuan, ‘Ramte, U Kima paw’n a tih rêng kha—“Bruce Lee-a chuan inchees thuma hla atang paw’n Bâwng a hnek hlum thei!” tih min hrilh tawh kha. Kei chu ka awih,’ tiin Zawrhs-a lamah tho a rawn rawn tang zui ve leh a.
‘Bruce Lee kha a che rang lutuk a, hmuh hman chi a ni lo hrim hrim! Video paw’n lâk muan a ngai thin, an ti. A entuten an hmu hman thin lo a, silaw (slow) motion-in an la thin, an tih kha! Kungfu Master bon, Chem-Fawng-Fai-a paw’n a ngam hleinêm! Jimmy Kelly (Jim Kelly) pawh a hneh lo a nia aw…’ Maringa chuan a rawn ti ve leh bawk a.
Ramtea chuan Bruce Lee chu ngai sáng viau mah se, a thil sawi a thianten an awihsak duh vak loh avàng chuan a tan zui zêl ngam tlat lo! ‘Kei chu Kungfu-ah chuan Bruce Lee ai chuan Jackie Change hi rang ka ti fé zawk. A flim channa re re (rêng rêng)-ah hian camera trick a hmang ve ngai lo a nia aw … Flim an siam hian a kut leh a ke ruh a ti tliak ziah! Civil hospital-ah an kalpui ziah thin,’ a rawn ti ve ta khauh mai!
‘Civil hospital an nei ve kher em ni? I hria ‘mi? TB hospital pawh a ni thei asin! A le! A le!’ tiin Zawrhs-a chuan a’n ti el deuh sak a.
Ramte-a a zãm duh eih lo, ‘TB-a vei leu! Jackie Change-a’n phìrpui a nei tih pawh i hre leu,’ a ti ta!
Zawrhs-a chuan, ‘Tûnge? Han sawi la … an hming pawh i hria ‘mi?’ a lo ti nghâl zat a.
Ramtea chuan, ‘Pahnih-hnih a nei maw le! Pakhat chu Jackie Cham-a a nia; pakhat leh chu Jackie Chang-a,’ a ti ta a. Mi dang zawng chu an ka ho ta mai! Ramtea chu hria an ti leh ta êm êm mai a!
Maringa chuan, ‘Bruce Lee chu a la thi lo a ni ang … Â u te paw’n an sawi tlat,’ a han ti zauh. Mi dang chuan an en ta thup mai si. ‘Eng tin nge an sawi?’ an ti hlawm a.
‘
Hmãnah khawvêla Kungfu thiam ber lawmman pêk an tum a, an pêk tum chu Jackie Change-a hi a nia. Mahse, a dawng duh miah lo!’ Maringa chuan a’n tia.
‘Ngati?’ tiin an han zâwt dílchhût leh ta. Maringa bawk chuan, ‘Jackie Change chuan, “Kei aia Kungfu thiam a awm alãwm,” a ti tlat a. Chuan, mi pakhat, hmai tuam vek hi a lo kal a. Tunge a ni tih tù ma’n an hre thei lo a. Mahse, chu hmai tuampa chuan lawmman chu a rawn dawng tlat! Mi zawng zawngin Bruce Lee-a a nih an ring vek!’ a tih zawm zat a.
Zawrhs-a chuan awih tho mah se, Jackie Chan lamah chuan a tang lo laklawh tawh tlat! Hnial dàn tùr zawn a ngai. ‘Ka awih pît! A double role a ni ang!’ a ti hrãm a!
‘Intihsiak sawi sawiah chuan, ‘nih leh tunge khawvêla lám thiam ber in hria ‘mi?’ Rualthana chuan rawn ti ve a.
Mi dang zawng chuan, ‘Mithun-a!’ an ti rual thap a.
Rualthana chuan inla-confi’ tâwkin, ‘Inring dik têp. Mithun-a a ni teuh rasss! Mithun-a leh Michael Jackson-a an inlàmsiak a. Mithun-a hi step khatin a chak lo! K’u Thanga paw’n a ti vek,’ a rawn ti ta a.
Naupang tawng tlém Lalthana a rawn tawng ve a, ‘Slow-ah chuan kei chuan, Mithun-a a chak zâwk ka ring tho tho,’ a rawn ti hrãm a. Mi dangho pawh chuan, ‘Kei pek,’ an ti tliar tliar bawk a…
‘Ka’ r’u, U Sàwma te inah chuan kal tawh ang u,’ tiin an zínga upa ber, Zawrhs-a chuan ro a’n rél a. An ding ta suau a. ‘Tù mah vawih loh tùr. Chiang em?’ a ti leh a.
Mi dang zawng chuan, ‘Chiang e,’ an ti rual leh thap a.
‘Chuan, Lal-Petera’n Lalthana a koki-chhuan ang a, an ventilation parda phèn atangin TV an chhuah leh chhuah loh a bih thla phawt ang. An chhuah chuan, hlen chil chàr a tih tawh ang chiahin Ramtea’n TV en a díl ang. An phal chuan, kan vaiin “Kan vawih miah lo ang!” kan ti rual ang! Chiang maw…?’ Zawrhs-a chuan fiak tha thet thawt tak mai hian a’n tih leh a. Mi dangin an chhàn leh hnu chuan, an U Sàwma te in lama TV en tum chuan an inzui ta thám thâm a…