Aizawl : ZPM chuan nimin khan an party pisa-ah chhung inkhawm an nei a, he huna thu sawitu ZPM Vice President Rev Dr K Thanzauva chuan, tuna Mizo khawtlang kalphung, mi tlemte hamthatna hi mi tinte intluktlanna vantlang nunin thlak an tum thu a sawi.
Rev Dr K Thanzauva chuan, Pathian ram politics chu hma thlir tha tak nei a ni tur a ni tih sawiin, “Tuna kan khawtlang kalphung, mi tlem te hamthatna hi mi tinte intluktlanna vantlang nunin thlak kan tum tur a ni. Chutiang tur chuan system dik a tul a, a kengkawhtu leh hmangtu mihring dik a ngai a, fel leh taihmak a ngai a, mi tha kan nih a tul a, ramhruaitu atan mihring rilru tha leh mawi kan nei ngei tur a ni,” a ti.
Pathian ram politics chu rethei te lama tan hi a ni tih sawiin ZPM Vice President hian, “Kan ramah mi tam tak retheihna khurah an lut a, mi tam tak chu hman atangin vawiin thlengin an la rethei reng a, a pawi khawp mai,” tia sawiin, ZPM hi mi retheite lamah tangin thawhchhuahpui a, chhanchhuah an ngai niin a sawi.
ZPM Vice President hian, Pathian ram politics tungding turin hmangaihna leh inngaihtlawmna nen mahni inphatin, mualphona leh tuarna an huam tur a ni a. He mi hmang chauh hian ram hi a tho leh dawn nia sawiin, “Beidawnna leh harsatna karah pawh hei leh chen min hruaitu Pathian hian min kalsan lo vang. Kohhrana kan tihdik theih hi sorkarh pawh kan ti thei ang; a system dik se la, mihring dik ila, kan dam tlanna khawtlang kan siam thei ang,” a ti bawk.