Aizawl: Govt Mizoram Law College Student Bar Council-in an college-a academic building sak chu January 4, 2022-a zawh tawh tur ni mah se, tun thlenga sak zawh a la ni lo leh building sak a chhe lutuk chu an hriatthiam loh thu an sawi.
Nimin khan Govt Mizoram Law College SBC hruaitute chuan Aizawl Press Club-ah thuthar thehdarhtute kawmin an Vice President S.B Ngoliankima chuan an college academic building chu RUSA 2.0 hnuaia Rs 1,70,00,000 hmanga sak mek a ni a, building sak hna hi restrict tender hmanga contract pek, Sky Ridge Construction & Consultancy Services, Aizawl-in an thawk a, deed of agreement ang chuan January 4,2022-a zawh tawh tur a ni tih a sawi.
Hetihlai hian thla 12 a ral hnuah pawh hna zaa 40 chauh an thawh zawh thu leh heti zat chauh hna an thawh laia RUSA lamin Rs 1,17,96,000 an release chu hriatthiam har an tih thu a sawi a. An hnathawh chin pawh hi a tha lo hle a, an hmanruate a that leh that loh endik tura tih pawh an zawm lo a, tuna structure ding lai chu chhunzawm zel chi-ah an ngai lo tih a sawi.
S.B Ngoliankima chuan an college building satu chu deed of agreement zawm loa hna a thawh vang te, zirlaite himna ngaihthah leh an nunna hial hloh theihna dinhmuna dah pawh pawisa lo ni awm taka hna tha lo taka a thawh avangin a lakah dan anga na taka hmalak an phut tih a sawi a, March thla chhung ngeia an college building chu hmanraw tha leh rintlak hmang ngeia sak zawh an phut thu leh an thil phut chu tihhlawhtlin a nih loh chuan dan anga hmalak zel an tum thu a sawi a ni.
Govt Mizoram Law College SBC hruaitute chuan an college building satu hian restricted tender vekin Mizorama college hrang hrang 15 zetah contract a hmu tih an hriat thu sawiin, a hnathawhte chu a tha lo tlang hle tihte, contractor rintlak loh tak mai sorkarin restricted tender hmanga contract a pe chu an dem tak zet tih an sawi a, tun hnuah chuan hna pe tawh lo tura sorkar an ngen thu an sawi bawk a ni.