Aizawl: Agriculture Minister C Lalrinsanga’n SEDP hnuaia vaimim chintir atangin metric tonne 19,085 thar chhuah a ni a, chhunzawm zel tlaka an ngaih thu leh Mizorama hmarcha thar chhuah USA-ah thawn a ni dawn tih house a hrilh.
Nimin Assembly session-a Serchhip MLA Lalduhoma zawhna chhangin agricultute minister chuan SEDP hnuaia vaimim thar chhuahte chu sorkarin a theih ang anga an leisak thu a sawi a, “Quintal 1,094.61 chu kg khat Rs 20 zelin Serchhip-ah leisak a ni a, quintal 541.42 chu kg khat Rs 24-in Tanhril hmunah leisak a ni,” a ti.
Vaimim tharte chu department-in an thlirna atang chuan hlawk hleah an ngai a, chhunzawm zel tlakah pawh an ngai tih a sawi.
Mizorama vaimim tharte chu rante pawhin an ngeih bik nia a lan thu sawi bawkin, “Vaimin atanga siam ran chaw phai lam atanga lak luh leh Mizorama thar atanga siam ran chaw chu vawk no pek an ni a, helaia kan thar atanga siam chhuah hi vawk no hian a letin a ngei zawk a ni,” a ti.
Agricultute minister chuan Mizoram chhim lama lo neitute thar chhuah hmarcha chu USA-ah thawn tum a nih thu a sawi bawk a. USA atangin hmarchate hi an lei duh a, organic a ni ngei tih pawh an finfiah tawh a, session zawh lamah hi chuan Siaha leh Lawngtlai lam atanga thar chhuah hmarcha metric tonne 7.5 vel chu thawn chhuak turin an vai liam thei turah a ngaih thu a sawi bawk.