Home Minister Lalchamliana’n Assam state-in Mizoram ram chhuhsak a neih loh thu leh ramri hrula cheng huan neiten an thlai rah seng kawngah harsatna an nei lo tih jouse a hrilh.
Budget session neih mekah nimin khan Thorang bialtu MLA Zodintluanga Ralte zawhna chhangin home minister chuan, “Assam state-in Mizoram ram min chhuhsak a nei lo va, a nihna takah chuan Assam-in ramria a pawm, 1933 notification pelin tun dinhmunah kan awm,” a ti.
Mizoramin ramria a pawm, 1875 notification thleng chu luah turin hmalak mek a nih thu home minister chuan a sawi a. Assam state ramri hrula awm huan leh thlai neiten an huan thlai rah an seng chungchangah harsatna tawk an awm lo tih a sawi.
Member dangte zawhna chhangin home minister chuan Mizoram Police-in motor a neihte chu a chhiat hle thu a sawi a, “Police modernisation scheme-ah hian motor-te lei phal a ni thin a, quarter-te pawh sak phal a ni a; mahse, kum nga kum ruk kalta vek atang khan an phal ta lo a, hemi avang hian tunah hian kan motor-te hi a chhe em em vek a, police station tin deuhthawin motor tha deuh an mamawh thu min lo hrilh thin,” a ti a, tun dinhmunah chuan motor chhiat avanga harsatna an tawh mek chu chin fel theih a nih rih loh thu a sawi.
Tun hnaia Mizoram Police 5th IR battalion mi leh saten Lengpui Airport an tihfai chungchang zawhna pawh chhangin home minister chuan Mizoramin B20 meeting a thlen tur atana inbuatsaihna kal zelah G20 Committee-in an sawm angin IR mi 50-te chuan Lengpui Airport an tifai tih a sawi a, hei hi minister a nihna angin a hriatpui lo a, G20 committee hmalakna a nih thu a sawi bawk a ni.