Paris Saint-Germain in Ligue 1 a hma an hruaina an ti zau a, anmahni eltu zing ami Olympique Marseille lakah 3-0 in hnehna an chang a. Goal khungtu pahnihten mellung thar an kai ve ve.
Stade Vélodrome a inkhelah mikhual tan Argentina captain Lionel Messi chuan club football a a goal 700-na a khung a. Cristiano Ronaldo hnua Europe a league lian panga zinga goal 700 khung tling thei hmasa ber a ni.
An star player dang Kylian Mbappe chuan goal hnih khung bawkin Paris Saint-Germain chanchin a goal khung tam ber record Edinson Cavani siam chu a tluk chiah.
PSG in hnehna an chan avangin point 8 in league-ah hma an hruai mek.
Mbappe-a’n minute 25-naah Messi siamsak atangin goal hmasa a khung a. Minute li hnuah Messi siamsak let ve lehin second half-ah an pahnih bawkin Marseille tlarhnung an thiat a, an goal thumna France forward in a khung leh a ni.
Kum 2017 a Monaco atanga PSG zawmtu Mbappe hian Cavani goal khung zat khung tur hian inelna hrang hrangah match 246 bak a mamawh lo.
Messi hian goal 700 hi match 840 chhungin a khung.