Manchester United in kum 2017 hnua a vawikhatna atan trophy an la a. Newcastle United nen English Football League Cup final khelin 2-0 in hnehna an chang.
Pathianni zan Wembley Stadium a inkhelah hlawhtlinna nei khat tawh United leh trophy lian la ngai lem lo Newcastle United te an inkhel dawn a, club tantute an phur a, London a stadium lian thawm a ring.
Magpies in beisei nei sang mahse first half-ah minute ruk chhungin goal hnih an chhuah a. United in manager Erik ten Hag hnuaiah trophy an la nghal.
Ten Hag-a United
Red Devils in an player chhawr than ho an chhawr leh vek a, inkhel a kal reiin an khelhdan nghet in an khel tih a lang. Minute 33- naah Luke Shaw freekick chu Casemiro chuan tauh goal in goal an khung.
Minute ruk hnuah United in counterattack atangin Marcus Rashford hmangin ball an lalut a. Sven Botman chuan a goal shot lo dan pial sakin goal-ah a lut. Magpies defender own goal a kal tir a ni.
Eddie Howe-a pawlte hian halftime zawhah an inremdan thlakin United nawr buai an tum. Minute sawm panga chhung vel ti thei mahse United an inveng hneh a. A tawp thlengin a sen lamin harsatna lian lutuk an nei lo.
United hian kum ruk kalta a Jose Mourinho hnuaia Europa League an lak hnuah a vawikhatna atan trophy an la a. Hemi season hian EFL Trophy hi an lo la ve tawh bawk.
Manager Ten Hag-a hnuaiah United hmelhmang a danglam a, hma an sawn tih a chiang.
Magpies lakah an football tha ber khel bik lo mahse inkhel an thunun laiin awmze neiin an che a, goal an khung thei bik. Hei hi club pahnih danglamna a ni.
Mimal a thlurbing turah goal khungtu Casemiro a fakawm a, United khawlpuiah a tang leh.
Tlarhnungah Lisandro Martinez a huaisen a, Raphael Varane a chiai lo. A hma lamah Wout Weghorst-a’n goal bawh na lo mahse a thawhrimna chu Marcus Rashford tihlauhawmtu a ni a. Dinglamah Antony a hnawk.
Hmawrbawk theih loh a pawi
Season tha hmang Newcastle United in an tawh an khirh tih a hmuh theih, mahse tunhnaiah goal hmaah an hriam lo.
United lakah pawh an buaina thildang a ni lo. Winger Allan Saint-Maximin chuan Diogo Dalot chhaih luhai viau mahse chance mumal-ah a chhuak hleithei lo thin a. Ani chauh ni lovin Joelinton, Callum WIlson leh midangte pawhin hlauhawm mumal siam an harsat.
“Kan duh belh”
Manchester United midfielder Bruno Fernandes chuan, “He hun nghak hian kan bei nasa a, ka trophy hmasa ber a nih avangin ka lungawi. Mahse a dang lakbelh zel kan duh a ni. Tun season a a hmasa ber a ni a, he club tan hian a tawk thei lo. A dang kan duh belh zel.” tiin a sawi a.
“Manchester United hi a nihna dik tak a kir leh tura hna thawk tan chauh kan ni a, hei hi a hmasa ber a ni.” tiin manager Ten Hag chuan a sawi ve bawk.