Zu zawrh policy-a ei rua puh avanga Delhi Deputy Chief Minister Manish Sisodia man a ni chu eptu party hrang hrang thuikhawmtu a ni mek a, nakumah inthlanpui a awm dawn mek laiin BJP laka thukhat vuaa tanhona lian tak a siam mek.
Eptu party zawng zawngin Thawhtanni atang khan Arvind Kejriwal-a kaihhruai, Aam Aadmi Party lam an tang tih theih a ni mek.
Congress erawh chuan AAP lam tang chiah lovin sorkar laipuia thuneihna chelh mektu, BJP-in an hnuaia investigative agency a hman dan chu nasa takin an sawisel.
Delhi Congress hi Anna Hazare-a’n Anti-Corruption Movement a kalpui atang tawh khan AAP nen hian an lo inep tawh a, a hnu kum thumah an sorkar zui a. An hruaitute chuan Sisodia-a man a ni chu tha an tih thu leh Kejriwal-a chu a dawt leha mi tur a nih ngei thu an sawi.
Hetih lai hian Thawhtanni khan Congress media in-charge Jairam Ramesh chuan eptute lamah an tang tih Twitter-ah a tar lang a, AAP lamah erawh an tang chuang lo.
BJP kaihhruai sorkar a din hnuah khan eptute hian central agency-te chu hmang tangkaia anmahni beitute laka kutthlak nana hmangah an puh fo tawh thin a. Ram chhunga eptu hruaitu lawk tak takte in an dap a, ei rua puh zingah an hming chuantirin man pawh an ni fo.
Delhi-a sikulte dinhmun nasa taka chawikangtu, Sisodia-a man a ni leh ta hian eptute sawi a titam hle a, an lungawi lo tak zet.
Trinamool Congress hruaitu, Derek O’Brien chuan Sisodia-a hi BJP-in an duh duha an tihkawi theih chu ni sela an man ngai dawn loh thu Twitter-ah a tar lang a. BJP chu hnawl vek a nih thu leh CBI, ED, IT chauh an lama awm an ni tawh tih a tar lang.
“Delhi-a zirna kalphung thlak danglamtu, Pu Manish Sisodia-a man a ni hian BJP hian zirna chauh a do lo va, Delhi naupangte hma lam hun pawh a do a ni,” tiin Samajwadi Party chief Akhilesh Yadav chuan a tar lang bawk.
Uddhav Thackeray-a pawl, Shiv Sena-a an hruaitu hlun, eptu hruaitu zinga tun thlenga lung in tang mek, Sanjay Raut pawhin, “BJP-in eptu hruaitute an man dan thlir hian thuneihna an chan loh hnuah an hruaitute awm dan tur eng nge ni ang?” a ti.
CPM pawhin thu an chhuahah Sisodia-a man a ni chu ‘Modi-a sorkarin central investigative agency-te ralthuama hmanga eptu party hruaitute a bitumna’ a nih thu an sawi.
Telangana-a rorel lai, Bharat Rashtra Samithi, Nitish Kumar-a Janta Dal United, Tejashwi Yadav-a Rashtriya Janata Dal leh Congress thawhpui, Jharkhand Mukti Morcha te pawhin Sisodia-a man a ni chu an dem thu an sawi hlawm.