Aizawl: Mizoram Pradesh Congress Committee (MPCC) President Lalsawta’n nimin khan kum 2023 MLA General election neih tura Congress party manifesto pahnihna, ‘Sorkar tha (Good Governance)’ a tlangzarh.
Congress Bhawan-a manifesto tlangzarh inkhawmah Lalsawta hian manifesto hi sorkar hunah chauha nunpuia vei tur a nih loh thu sawiin, “Kan sorkar hma hian keimahniah kan lantir tur a ni a, kan vei tur a ni a, a takin kan nunpui tur a ni. Sorkar tha siam hi kan tum tak tak a, hlenchhuah ngei pawh kan tum a ni,” a ti.
Lalsawta hian, “Sorkar thaah chuan thil tha tih a awlsam a, thil sual tih a harsa thin. Sorkar tha loah chuan hausak a zahthlak a, sorkar thaah chuan retheih a zahthlak a. Mipui retheih laia sorkar hotute hausak hi sorkar tha lo zia a ni,” tia sawiin, mi retheite hausakna tur sorkar tha siam hi an tum thu leh an kal dan tur a nih thu a sawi.
Chief minister, minister leh MLA te hi langsar leh lian takin angin lang mah se sorkar hnathawkten a nihna ang taka an thawh avang zawkin ram hmel a danglam thin thu sawiin MPCC president hian, “Sorkar hnathawkte hi sorkar kutke ber an ni,” a ti.
Lalsawta hian sorkar hnathawk pension tawh te, pension mai tur leh pension mekte tana tha zawk, Old Pension Scheme kalpui an tlin thu leh kalpui chhunzawm turin theihna an neih thu a sawi a. “Kum tam tak, Mizorama sorkar hnathawk awm hmasa ber atang vawiin thleng hian Old Pension Scheme hmanga pension vek an ni a, kan tlin reng a ni. Tunah hian new pension scheme atan kum tin nuai 4,500 chuang kan hmang reng a. Old pension pawisa pek ngai bawk, new pension atana pawisa sen ngai bawk hi Mizoram tan chuan a hautak lutuk,” a ti.