Manchester City in FA Cup quarter-final lut turin harsatna an nei hran lova. Championship a khel club Bristol City 3-0 in an hneh.
Thawhlehni zana Ashton Gate a FA Cup fifth round inkhelah Manchester City tan tunhnaia inkhel tam lo England attacking midfielder Phil Foden a langsar a. World Cup zawhah inkhel tam lo mahse tun ni li chhunga a chet that chhunzawmin goal thum a khung tling tawh.
Inrinni zana Bournemouth laka goal a khung hnuah kum 22 mi Foden hian minute 7-naah an goal hmahruai a khung a. Minute 71-naah Julian Alvarez-a ball siamsak atangin an goal hnihna a khung a. Huntawp hma in Man City tan Kevin de Bruyne chuan yard 25 a hla atangin an goal thumna a khung ve leh bawk.
Bristol City hi December 26 atang khan a zawna game 12 tlawm tawh lo an ni a. Premier League champion lai lakah tlawm chiang mahse an inkhel a fakawm viau.
City goalkeeper Stefan Ortega chuan Alex Scott goal khung tur tha taka a dansak bakah Mark Sykes hmangin penalty beiseina an nei.
Inkhel zawh lam
Manchester City manager Pep Guardiola chuan, “Bul kan tan that avangin kan lawm a, ball an chan chiahin an hlauhawm nghal hle thei tih kan hria. 1-0 a nihlai khan engkim a la inhawng a, goal hnihna leh thumna kan khung kha thil lawmawm tak a ni. He inelna a kal zel hi kan duh a, final khelh leh ngei kan tum.” tiin a sawi.
Goal hnih khungtu Foden chuan, “Ka fit tha vek leh tawhin ka inhria a, inkhelh pawh nuam ka ti. Tunhnaia ka huntawn kha ka inkhelh hun chhunga hun hreawm ber zing ami a ni a, mahse tupawn harsatna tawhlai leh khelhchhiat lai hi chu an nei ve vek.”
“Ka ke ka tihnat deuh avangin ngai ka awh lova, mahse tunah chuan ka tha vek tawh.” a ti ve bawk.
Foxes an tla
England a division sang ber dawttu Championship a che tha tak Blackburn Rovers chuan FA Cup fifth round-ah beisei loh result an thlen tir a, Premier League club Leicester City chu 2-1 in an hneh.
Championship a palina ni mek Rovers hian King Power Stadium-ah huaisen takin football an khel a. An goal nawr chu rang thei thin hle in goal hnih aia tam khung thei an ni.
Leicester City goalkeeper Daniel Iversen chuan a chance hmasa zawk a save sak hnuah minute 33-naah Tyrhys Dolan chuan an goal hmasa zawk a khung a. Minute 52-naah Sammie Szmodics chuan khung belhin offside avanga goal pawm loh dang a nei bawk.
Substitute Kelechi Iheanacho chuan Leicester City tan goal khat a khung ve bawk a, mahse Brendan Rodgers-a pawlte hi inkhel pumpui thlirin tlawm an phu zawk.
Inkhel dang
Thawhlehni zan FA Cup inkhel dangah Brighton & Hove Albion tan rawlthar striker beiseiawm Evan Ferguson chuan goal a khung a. 1-0 in Stoke City an hneh a. Kum ruk chhungin a vawi thumna atan quarter-final an khel dawn.
League lama che chhe lo Fulham in Leeds United an paihthla a, Joao Palhinha leh Manor Solomon ten goal khungin 2-0 in an chak a, kum 2010 hnua a vawikhat nan last 8-ah an inlan dawn.