Aizawl: MNF Sr. Vice President Tawnluia, Deputy Chief Minister-in mi thenkhatten kal sual leh India hmelma angin sawi mah se Laldenga kha zalenna sualtu, freedom fighter an ti a, Mizo Hnam Paah an puang tih a sawi.
Nimin khan Mizo Hnam Runah Mizo National Day vawi 57-na hman a ni a. Thu sawiin Tawnluia hian, “Pu Laldenga’n Mizo hnam champion tura a kaihruaina kha a nep lo va, hnam dang laka nekchep kan nihna tur ata khaichhuakin, hnam dang hriat leh thlir kan ni. Mizo hnam tan zalenna a sual a, ram tan a bei ngam a ni. Mi thenkhatten kal sual leh India hmelma angin sawi mah se, keini chuan Pu Laldenga kha freedom fighter kan ti a, Mizo Hnam Pa-ah kan puang a ni,” a ti.
MNF Sr.Vice President hian hnam tana martarte kha Mizo hnam kal zelna tura nun hlante an nih thu a sawi a. Ramhnuaia an lut chu thil nuam a ni lo tih sawiin, an thil tawn turte kha hre lawk se la chuan an ngam lo mai thei tih sawiin, mahni tana rammu an nih loh thu leh ram leh hnam tana thawk an nih thu a sawi.
Zohnahthlak hrang hrangte rorelna pakhat hnuaia awm chu an duh ber thu leh MNF nationalism laimu pakhat a la ni reng tih a sawiin Tawnluia hian, “Myanmar leh Bangladesh atangin kan unau raltlan an lo lut a. Raltlan tan India sorkar a che thei lo. Kan pianpui unaute kan phatsan thei lo a, kan thlahthlam dawn lo. Kan tihtheih tawk tlem mah se, theihtawp kan chhuah a, chaw nghei an awm kan phal lo a ni,” a ti.
Mizo National Day hmanna inkhawm K.Vanlalauva, MNF Treasurer kaihhruaiah hian MNF Vice President Vanlalzawma pawhin thu a sawi a ni.