Australian police chuan kum 2018-a Queensland vaukama thia nula chhar thattua puh, Indian pa chu an ramah a chungthu relsak turin an hruai.
Rajwinder Singh-a hi Delhi atangin detective nen Melbourne panpui a ni a, Nilainiah hian an thleng ang.
Kum 24 mi, Toyah Cordingley-i thattua puh a ni.
Cordingley-i ruang hi October, 2018 khan hmuh niin ‘nasa taka sawisak hrep’ nia sawi a ni.
Singh-a hi Victoria state-a court-ah a inlan phawt ang a, pawikhawihna thlenna, Queensland panpui zui leh a ni ang.
Brisbane khawpuiah kartawpah magistrate a hmu ang a, police-in an kawl zui dawn a ni.
Singh-a hi nikum November khan Delhi-ah man a ni a, a hmain Queensland sorkar chuan a chinchang hrilh thei hnenah A $ maktaduai 1 zet pek an tiam hman.
Punjab-a Buttar Kalan atanga zi chhuak, Singh-a hi pawi a khawih lai hian tual a thahna hmun atanga darkar hnih chuang hret kal, Innisfail-ah a cheng.
Police chuan kum 38 mi, Singh-a hian Cordingley-i a thah hnu lawkah hian Australia a chhuahsan nghal a, Punjab-ah kum li zet a awm zui niin an sawi a. Indian officer-te chuan Delhi-ah hian damdawi ina inentir turin a kal tih an hriat ruk atangin an man ta a ni.
Detective-te chuan Cordingley-i thih dan hi an la puang tlem hle.
October 21, 2018 khan khualzinte tlawh thin hmun lar tak pahnih, Cairns leh Port Douglas inkara Wangetti Beach-a a ui nena a tei chhuak chu a haw ta lo a ni.
A ruang hi a tukah a pain a hmu a, a taksa zahve chu vaukama vuta lo phum a ni.
A thattu luman atana A $ maktaduai 1 chhiar hi Queensland-ah chuan luman chhiar san ber a ni a. Nikuma luman chhiar zat puan a nih khan Cordingley-i pa, Troy Cordingley chuan a fanu chu ‘nula duhawm tak, nun zalen leh khawvel chen tur tam tak a la neihte laksak ni ta’ angin a sawi a ni.
Singh-a man a nih lai khan Queensland Police Minister Mark Ryan chuan ‘rei tak an lo nghah tawh’ chu a tak an hmu ta tih a sawi a, a dawt leha an tih tur chu ‘Toyah-i tana dikna hlenchhuah’ a nih thu a sawi bawk.