MZP-in March 1, 1966-a MNF-in zalênna an puan ni champha denchhenin nimin khan zalênna sualtute zinga mi – War Secretary Vanlalngaia, Senator Bualhranga, Brig. Gen. R Sangkawia leh Col. Lalrawnliana te kawmna hun an buatsaih.
Zirlai kalkhawmten zawhna hrang hrang an zawhte chhangin, zalênna sualtute hian thu an sawi a. ‘Eng vanga hnam movement a inpe nge?, Zalênna an sual hi an inchhir em tih te zirlai ten an zawt a. “Zalênna sualtute kha an thluak suksak an ni em?” tih zawhna chu, “Zalenna suala inpe, nunna chân huama hnam hmangaihna vanga chhuakte kha an thluak suksak an ni lo,” tiin an chhang.
Zalênna sualtute kawmna-ah hian ICFAI University-a Mizo department zirlaite leh Govt. Aizawl West College-a Political Science zirlaite leh College hrang hrang zirlai hruaitute, hnam pual zirlai pawl hruaitute bakah MZP member eng emaw zat an tel a ni.