India hmarchhaka state pathum – Meghalaya, Nagaland leh Tripura-a tun hnaia assembly inthlana vote tlate chu Ningani khan chhiar a ni a. He chanchin ziah lai hian result kimchang la hriat loh mah se BJP chuan sorkar an siam vek dawn niin a lang.
BJP leh a thawhpuite chuan Tripura leh Nagaland-ah sorkar an siam dawn tih a chiang tawh a. Meghalaya-ah Conrad Sangma kaihhruai, National People’s Party (NPP) nen inthlan hmain inremna nei sa lo mah se an thawk duna sorkar an siam ngei hmel bawk.
Tripura-ah BJP leh an thawhpui, IPFT (Indigenous Progressive Front of Tripura) chuan bial 60 awmah bial 34-ah hma hruai an mek a, an lak ngei a rinawm a. Kum 2018-a an bial lak zat aiin 10 zetin a tlem thung.
Kum 35 zet ro lo rel tawh, Left leh an thawhpui thar, Congress chuan bual 14-ah hma hruaiin a hma aiin pahnihin an tlem zawk.
Pradyot Kishore Debbarma-a kaihhruai, tun tuma a vawi khat nana assembly inthlan chuhtu, Tipra Motha chuan bial 12-ah hma an hruai ve bawk a. Anni hi Greater Tipraland state hran ngaittute an ni.
Meghalaya-ah sorkar kal meka BJP nena thawk dun, Sangma kaihhruai NPP chuan bial 60 awmah bial 25-ah hma an hruai a, a zahve tling turin MLA panga tal an neih belh a ngai dawn.
NPP leh BJP hi tun tum inthlanah hian a hrangin an chuh a, BJP hian ei ru-ah chief minister kaihhruai party hi an puh a ni.
Nagaland-ah BJP leh an thawhpui, NDPP (Nationalist Democratic Progressive Party) chuan bial 60 awmah bial 38-ah hma an hruai mek a, sorkarna an siam thei ngei dawn tih a chiang hle a. He state-ah hian a vawi khat nan hmeichhia thlan tlin a ni a, hmeichhe MLA an nei ve dawn ta a ni.