Myanmar-ah mipuiten sipai sorkar duh lohna an lantir chhunzawm zel a. An khawpui, Yangon-ah chuan Pathiannia buaina chhuaka thite vuina neih niin an pung khawm tam hle.
Mipuite hian police-in an hnawh darh loh nan inhungna (barricade) an siam a, kawngpuiah Commander-in-chief Min Aung Hlaing-a lem an bel tuarh bawk.
Police-te pawh an che ve vat a, mipuite hnawh darh nan hian silai an hmet puak a, stun grenade leh mittui tlakna hlo an kap bawk a. Mipui pawh an tlanchhe nasa hle.
Yangon-a thil thlengah hian thi leh hliam an awm lo va, hmarthlang lama Kale khuaah erawh police-ten mipui hnawh darh nana silai an hmeh puahnaah mi pali an thi tih Reuters news agency chuan a tar lang.
Min Aung Hlaing chuan Thawhtanni khan sorkar TV-a thu a sawinaah mipuiten thu an awih loh zel chuan hremna an pe dawn tih a sawi a. Sorkara thawk, hna thawk duh lote chu na taka dan lek a ni dawn tih a sawi.
Police-in an hnawh darh hnuah mipuite hi pung khawm lehin sipai rorelna tihtawp an duh thu an aurualpui zui lehnghal.