Aizawl: Mizoram State Election Commission-in Lunglei Municipal Council (LMC) inthlan hmasa ber neih hun atan kumin March 29 a ruat a, model code of conduct pawh hman tan nghal a ni.
LMC inthlan hun tur hi State Election Commissioner Laima Chozah chuan nimin khan Lunglei-ah thuthar thehdarhtute kawmin a puang a. Inthlana chuh tumte tan hming pek luh theih nghal niin, March 10, chawhnu dar 3 thleng pek luh theih hun hawn a ni a. Hming pek luhte chu March 13-ah endik tur niin inhnukdawk leh duhte tan March 14 chawhnu dar 3 thleng hun hawn a ni ang a, candidate-te symbol chu March 15-ah pek chhuah a ni ang.
Inthlan puan a nih atangin model code of conduct hman nghal a nih thu leh Lungleia sorkar hnathawkte chu State Election Commission hnuaia deputation-a thawk an ni nghal vek tih SEC chuan a sawi a. LMC inthlan lo awm turah hian candidate pakhat tan Rs. nuai 1 aia tam lo hman phal a nih thu a sawi bawk.
SEC tawiawmtu, Lunglei Bawrhsap Ramdinliani’n LMC inthlanna atan hian polling station 44 a awm tur thu sawiin, LMC inthlan lo awm turah tluang taka inthlan neih a niha dan leh thupek leh model code of conduct tha taka zawm a nih theih nan thuthar thehdarhtute chu thahnemngai taka official-te thawhpui turin a sawm.
LMC inthlan hun puan a nih rual hian SEC Laima Chozah kaihhruaiin LMC ward 11 atanga hmeichhe ward tur pali pawh a ni a, chungte chu – Ward II (Serkawn, Zohnuai); Ward V (Rahsiveng, Sazaikawn, Hauruang); Ward VIII (Ramthar Veng, Farm Veng) leh Ward X (Sethlun, Luangmual, Theiriat, Hranchalkawn ) te an ni.
LMC huam chhungah vote nei mipa 19,117 leh hmeichhia 21,424, an vaiin voter mi 40541 an awm.
Ward 11 zinga voter tam berna chu Ward V niin, veng pathum – Rahsi Veng, Sazaikawn leh Hauruang te a huam a, vote nei 4,238 an awm a; voter tlem berna, Ward XI-na niin, veng pathum bawk – Lungpuizawl, Zobawk North leh Zobawk South te a huam a, vote nei 2,975 an awm a ni.